Kyrchaan sa ka KSU-JHDU ya ka KAS wow dawa pynpsiah noh ya ka ktien Khasi ha ka 8th Schedule

Jowai: Ka KSU – Jaiñtia Hills District Unit da pynsñiaw ko yei sñiawkhia kawa joor hadein wa yoh ki u embynta haka yalang phyllu yumut (Seminar) hajrong ka phang kawa ong “Hawa im ka ktien, im ka jaitbru” kawa pynman ha kani ka 25 tarik ha Jaiñtia Eastern College Khliehriat, kawa da pynman da ka Khasi Author’s Society (KAS) deilang waka Khasi Department yong kani ka thaw puræ kawa da yaklam yei emkaam wow pynpsiah ya ka ktien Khasi hapoh ka 8^th Schedule ka riti synchaar ka ri India.

Ka seiñ da e ko ya ka kyrchaan kawa pura ya ka KAS ya kani ka bynta kawa khroo wa da leh ko neibynta ka jaitbru Ynñiawtrep kawa man leh ka bru khian paaid.

Ka seiñ da ong ko wa ka sorkar emkaam ko wow tip lada i dooh ya ka ktien, man i iwa dooh ya jaitbru wei man ko ka phang wa ka seiñ leh angnood wei thrang ko wow yoh wei daw thoh ko leh cha ka sorkar jylla wow pynman sakhiat yeini i dawa wow tipmit ya ka ktien Khasi.

Ka seiñ da chim ko leh ya ka rai wow klam noh da ka ktien Khasi hawa yachem ki wa ki heh sorkar kiwa ymtoh ki tre jylla kam ka dak wow pynkrehkaam noh ya i dawa wow tipmit noh ya ka ktien Khasi.