Kat dang mih ki sngi i yakhih ka Jaiñtia Hills Truck Owners Association (JHTOA) dang joor i wei da yoh ko leh ya i kyrchaan na kiwa boon ki seiñ ka jylla kam ka JSU, JYF, JSM, EJNC, MPUF, KJNU wa kiwi kiwi.
Ha kani ka kynti ka North East Truck Owner Welfare Society (NETOWS) na Guwahati, Assam leh da e ko yei kyrchaan ya ka JHTOA.
Ka NETOWS da ong ko wa ki karkhana pynmih khyndaw-bilat da sdang ki wow thied da ki yong ki hi ki kari wei ini da ktah bha i ya ki tre Truck na Meghalaya wa Assam.
Da ong ko wa ka sorkar jylla da e yarap Subsidy ko hawa sdang ya ki karkhana neibhah ki karkhana daw yarap ki wow e kreh ya ki tre jylla tangwa katni ini da man i mar dei kylla.
Chooh chooh ka NETOWS da ong ko wa ki karkhana da su ki ya ka bai kit hadooh katni da man i katkam i dor wa chiphaw snem nachwa tangwa i dor i phñiang, ki kari, ki tiar kari wa kiwi kiwi da neh bait ki kamjooh.
Kamtæ ka NETOWS da kyntu ko ya ka JHTOA wow pteiñ ya i yakhih katkam wa yoobiang wei neiliang yong ka NETOWS leh da e ko i kyrchaan wa pura ya ka JHTOA.
