Ki seiñbhalang wa em hapoh ka Save Hynñiewtrep Movement (SHM) da yang ki ya u Montri Rangbah ka jylla, u Conrad Sangma ynne ha Jowai ha laad Kiang Nangbah Government College hadien wa hiar u da ka Helicopter, deiwa rah ya ka Banner wa ki kot wow dawa takit da ka CBI ya ki kaam baamtooh hapoh ka jylla, u dawa pynkrehkaam ILP wa kiwi de kiwa man ki phang dawa hapoh ka SHM.
Ynne u Conrad da wan u cha Jowai yow booh mooyurim yaka Integrated Development Complex (Mini Secretariat) kamjooh wow wai yaka Maternal & Child Health Hospital Panaliar, Jowai.
Neiliang u Montri Rangbah da lai bait u chei thaw pynman yalang wa pynman ha pchem ka yung krehkaam ka PWD, Jowai hapyrdi i kyriaw dawa ILP ki seiñbhalang wei manda poi won u hei thaw psiah cha PWD da yang won sa ka seiñ kiwa chet ja-sngi ya ki khynnah skur kawa tip kam ka All Jaiñtia Mid Day Meal Workers Union kiwa da dawa wow pynku noh yaka tulop yong ki namo ka Honorarium ka bhah ka sorkar jylla naka T. 100 cha ka T. 2000 chi bnai.
Neiliang u Adviser ka seiñ, u Khroo Lamsalanki Pariat da ong u wa ka sorkar da dep ko wow mynjur pynku ya ka nong ki Mid Day Meal Cook, tangwa ym tip won ileh wym pynmih noh yaka hukum neibhah kamwa da tip da dep u pynbiang lut yei waroh iwa emkaam da ka sorkar nadooh ka chnat Muna Tangka ka jylla.
Hadien ini da wan won sa ki dkhot ka SHM kiwa da thmu wow psiah cha ka thaw pynlang yalang tangwa da khanglaad yaki da ki pulit.
