Ynne ka sngi u montri rangbah ka jylla, u Conrad K. Sangma da ong u wa i kreh ya ka Captain Williamson Sangma Technical University, em i ha ki kyrdan wa khaddooh wei daw ye u wai ya ka ha 21 tarik Duyatra (Jan) u snem wow wan kawa man leh ka lyngkhooh snem wa 50 yong ka jylla.
Hawa lai pait ya kani ka skurbah ka jylla, u Conrad da hun mynsien u yei kreh heiwa da ong u wa kamwa 80% i kreh da man i iwa dadep wei kyrmen skem u wa i kreh u pyndep noh hapoh u Naichiphaw yong uni u snem.
Da phah leh ya ka chnat PWD wow pyndep ya u sarok wow lai cha kani ka skurbah kawa em ha Balalgre, hajan ka Damalgre, South West Garo Hills ya kawa da chna hei lut iwa T. 16.96 klur.
“Kani ka skurbah daw pyndap ko yei emkaam ha ki liang puræ Engineering,” da ong u Conrad.
Kam wow kdaw heini, ya kani ka skurbah da e pyrtuid ha u montri rangbah wa nyngkong ka jylla, u (L) Captain Williamson A Sangma.
Da ong u leh wa ha u snem wow wan daw lehkmen yei dap 50 snem ka jylla wei daw e sñiawbha leh 50 tylli ki kaam pynroi neibynta ki paidbah ka jylla weiwa kani ka skurbah leh daw man ko kam chibynta yong ini i dap 50 snem.
Ha kani ka sngi da emlang ka MP na Tura, ka Agatha K. Sangma, u MLA ka North Tura, u Thomas A Sangma wa kiwi kiwi.
Hadien ini da lai pait leh yei kreh ha ka College of Architecture and Urban Planning, kawa nyngkong dooh ha ka thaaiñ mihsngi ha Balalgre ya kawa da yooluti wow wai noh ya ka ha u snem wow wan.
U Conrad da pyntip u wa da phah ya waroh wa toh wow pyndep yei kreh wei ki Class leh toh u sdang i nadooh u snem wow wan.
