Ynne ka sngi u Montri Rangbah ka jylla, u Conrad K. Sangma da booh mooyurim u ya ka Jorabat Combined Water Supply Scheme ha chnong Mawsmai, Ri-Bhoi District hei emlang u MLA ka Jirang Constituency, u Sosthenes Sohtun, u MDC ka Jirang Constituency, u Victor Ranee wa kiwi kiwi.
Lyngba kani ka Project daw ye u pynpoi um cha ki soo tylli ki chnong kitæ ka Jorabat, Mawsmai, Ampher wa Ampangiri heiwa u pynpoi ya ka umkor cha waroh ki manyung.
U Conrad hawa e yei klam da ong u wa ka Jal Jeevan Mission (JJM) toh ka thong krehkaam ka sorkar India wow pynpoi umkor cha waroh ki manyung wei i pynkreh ya ka hapoh ka jylla da man i iwa lai bait.
Da ong u wa ha jylla da em palat ar lak ki manyung wa yoh umkor namo ki Functional Household Tap Connection (FHTC) ha ka jylla hapoh chi snem chiteiñ lyngba ka Jal Jeevan Mission wei da kyrmen u wow kynjoh cha ka 6 lak ki FHTC ha u Kmaichonglad 2022.
Da kyntu u leh ya ki paidbah wow yada ya ki thaw wa em harood um khnang wow ye u pynneh yei em um ha kini ki thaw.
Chwa ini u Conrad da wai u ya ka Brahmaputra Guest House ka North Eastern Police Academy ha Umsaw, Ri Bhoi District kawa em 20 kamra neibynta kiwa wan emkaam ha kani ka thaw esikai ya ki pulit.
