Kam chibynta wow pyrkhat yei khooid i jngiar ha Iawmusiang, Jowai neiliang u Waheh Chnong ka Tympang Iawmusiang, u E. Shylla da kyrpaad u ya kiwa chongdai charood sarok wa ha ki luti lai kjat wow lai chong ki cha ki thaw wa da dep booh ya ki.
Da ong u wa ha kini ki bnai wa dadep neiliang ka chnong, ki bor District kamjooh ki pulit da khang ki neibhah wa kwah ya ki luti, ki syngkieñ wa ki luti lai kjat kiwa khooid wei neiliang ka chnong da chimkhia bha ko ya ini deiwa pyrkhat leh yei maa wa yang ya kiwa lai wa wan kamjooh leh yei khood i jngiar.
Tangwa da ong u wa kini kiwa chongdai da yaknieh bait ki wow yoh u chong ha khmut yaw bait hanla ka Seiñ Raij Jowai waka CNI da pynbiang thaw ki ya kini kiwa chongdai. Tangwa ym bien kini kiwa chongdai wow leh kamwa phah deiwa em bait i sñiaw ha ki wa ka Dorbar Chnong pyrchah wei yoobeiñ ko ya ki.
Neiliang u Waheh Chnong da pynche u wa da krehlang ki wa kiwa wan chongdai deiwa thooh ki laad ki luti yow yoh thaw chongdai yow ye u psa khon, kamtæ da kyrpaad ya kiwa chongdai wow chong ha ki thaw wa da pynkhreh kam ha yaw Seiñ Raij, CNI wa Yaw Chyiap khnang wa ka chnong waroh kawi u man ko kawa yoosuk neibhah ym toh wow pyrkhat wa ka Iawmusiang toh ka thaw noh jhep kawa yoh u leh katwa ngait.
Da kyntu leh wow sñiawbha wym toh u noh jhep ha ki thaw wa da khang wow noh jhep kiwa da em soo tylli wa da khang ka chnong.
