Ka Jaiñtia Students Movement (Nartiang Circle) hadien wada ood ki paidbah ka thaaiñ hei lai hei wan wa da jæd da pra u sarok nadooh Nartiang chadooh Khanduli. Neiliang ka seiñ da hiar ko wow pait wow sylli dei khmat wei da chem ko wa uni u sarok man u uwa da chah iehbeiñ haka chnat PWD.
Katkam ka yutip wa da yoh ka seiñ, ya uni u sarok da chna daka Dhar Company wei kattu la 7-8 snem ym em de chna pynbha pynmiat ya oo, wei neiliang ka seiñ da sñiaw lyngngoh ko wa u MLA ka thaaiñ u Sñiawbhalang Dhar hun u wow chna pynmiat du ha Wahiajer katwa nadooh Nartiang cha wah sa du i thlu i krem wei chong um u surok katni.
Heiyatoh wa i lai i wan ki kari kamai, ki kari yong ki samen bru da ood da naam ki tangwa kut hei klam khlem em wa ujor næ pyntip cha ki bor wa haneiñ.
Neiliang ka seiñ da kyrpaad ko naka chnat PWD wow chna smat ya uni u sarok wa boon kiwa kjut wa chitom wa lai lyngba uni u sarok, da dawa leh na u MLA ka thaaiñ wow smat u kreh kamwa kular u archah u leh bha yaka Constituency heipor Election, yooluti itu ikular u man i iwa sakhiat, da ong ka wyrta na u Bor Swer, Organising Secretary JSM Nartiang Circle.
