Jowai: Ka Jaintia Tribal Traders’ Association (JTTA), ynne ka sngi da yachem ki waka Dorbar Chnong Ladthadlaboh yow kyrpaad wa neini chakhmat u dam e NOC noh yaki baar jylla heiyatoh wa i khih i kreh wa ye da ki jaitbru yong i wow leh.
Hei yaklam wa u President ka JTTA u Iatha Najiar, ong u hei sakhiat ka chithi kwah yachem yong ki da dep e 2 snem nachwa wei da pynkynmoo biang haka 14 tarik u Khonchonglad (Nov) kamtæ ka chnong Ladthadlaboh da khut yachem ko waki ynne ka sngi.
Da khana u i daw wa kyrpaad ki yaka Ladthadlaboh wow dam e NOC cha ki baar jylla toh wa lyngba i wan wow booh yaki dukan dukdoh næ ki Company heh wei ini ktah ko yei khih i khan ki bru Pnar, wei tieñsar ki yaboi poi i por wym ye de ki u chongdai kamwa jooh man.
Da pynkynmoo u leh heiyatoh i pyrchah yong ki nachwa wow e NOC yaka VMart deiwa lai yachem wa u CEM ka JHADC heipor u M.B.Rymbai, tangwa ha kitu ki por won neiliang u CEM da pynyoo u yaka chithi wada kyrpaad daka dorbar chnong Ladthadlaboh hi yaka Council u e NOC deiwa kdaw yow yoh khih yoh kreh ki bru ka chnong kamjooh u bood ko yaki kyndon ka chnong.
U President ka JTA da pynrap u wa ha-o ye u man wa i wan ki Company baar jylla pynmyntoi ko yaka chnong kamjooh ya kiwa chong chnong, tangwa chwa u e toh u pyrkhat jngai won wa ktah ko ya kiwa boon ki khian ki dai wa chongdai haki yaw waphær waphær heiwa em i por tang ka bai cha leh wym lait, yeini du kiwa chongdai donhi wa tip.
Hajrong ini hei yaklam won wa u waheh chnong ka Ladthadlaboh u L.D. Lakiang, ong u wa hei yachem waka JTTA pynsñiaw ki yei diaw yong ki hajrong i e NOC ka chnong yaka VMart, wei wym ye leh u len neiwa e NOC em bait i dooh wei yoh myntoi.
Kamtæ ka dorbar chnong won deilang waki dkhot chnong yoo ki yei yoh myntoi kamwa 99% wa yoh khih ki khynro khyllood wym du ki khon ka Ladthadlaboh tangwa wot naki chnong waphær waphær ka District.
“Iwi wa nga sñiawthooh O ha kani ka pyrthai dooh kreh, wanrah ko yei yoh khih, tangwa u ong won wow yap thngan kiwi tawan kiwa chongdai, sñiaw yamrem O wei ym hoi u man kamtæ, tangwa hap em i mynsien yaleh (Competition) hei im,” ong u L.D. Lakiang.
Heiyatoh wa ki kaam wa chakhmat won ong u wym toh i rai yong oo samen kam u waheh chnong, neibhah nadooh nachwa leh ya kawon kawon ka rai da chim daka Executive Committee hadien wada wanrah yaklam ya kawon kawon ka phang.
Kamtæ hajrong kani ka phang leh daw yachong pyrkhat ki neibhah wa ki leh ym kwah ki waka District u boon da ki baar jylla, tangwa yei yi wym ye u kreh da ki bru yong i won ym yohsa ki.
Heijooh i por khut u yei ya krehlang neibhah iwa yoo eh ha kini ki sngi boon ki bru chim kabu deiwa chah pyrtuid. Yeini i bynta leh ong u wa ka chnong Ladthadlaboh leh maham bha ko.
“Toh u pyrchang u yieñ hei kjat yong i hi yow yakhun wa kiwi neibhah lym em kam itæ i mynsien yakhun, ym poi cheiwon cheiwon,” pynrap u L.D. Lakiang.
