Ka seiñ Meghalaya Truck Owner & Supplier Association (MTOSA), da yachem ko ya u Montri ka chnat Transport ka jylla, u Dasakhiatbha Lamare heiwa da ekti ko ya ka dorkhat ha oo.
Neiliang ka seiñ da ong ko wa ka chnat Transport da phah su ko ya ka kuna (Fine) kawa T. 10,000 manda slem wow pynthymme ya ki kot ki sla kari namo ka Renewal Permit hanlada slem ki wow pynthymme du chi sngi leh wei ini da ktah bha i ya ki tre truck ka jylla.
Da ong wa i wan ka khlam COVID-19 wa i pynkrehkaam ya ka khang-sbak (Lockdown) ha waroh kawi ka ri da chem chitom bha ki wow khih u kreh wei ini da ktah i ym du ya ki tangwa wot ya kiwi tawon ki paidbah ha ka jylla.
Chooh chooh da ong ka MTSOA wa boon ki dkhot yong ka kamjooh leh kiwi ki tre truck da thied truck ki da ka ram na ki Bank wei kam ha kini ki por da chem chitom ki wow su ya ka kisti (Equated Monthly Instalment namo ka EMI) iwa da ktah chooh chooh ya ki.
Heijooh i por da kyntu ka seiñ ya u Montri wow wyrai ya ki tre truck deiwa pynduna ya ka kuna manda slem ki wow pynthymme ya ki kot kari yong ki.
