Hadien wa ynne ka sngi da em uwi uwa na Meghalaya uwa liwan na Assam wa da pyntikna wa yoh COVID-19, neiliang ka sorkar da kyrpaad ko cha kiwa chong chnong ka jylla wow dam u lai cha Assam khamtam cha Guwahati.
Hawa yaklam waki laad pathai khubor ynne ka sngi, neiliang u monri i chait i khiah u AL Hek da pyntip u wa uni uwa dang yoh COVID-19 hapoh ka jylla toh uwa na Umden, Ribhoi wei uni u bru toh uwa da sah cha Assam la ar bnai.
Da liwan u haka 24 tarik uni u bnai wei da booh bait ya oo hapoh thaw leh Quarantine khlem yoh u wow liwan yung. Da pyntip wa uni toh uwa yah kari kit dud.
Neiliang u symbood montri rangbah ka jylla u Prestone Tynsong da ong u wa ka sorkar u pynrkhiñ chooh chooh ko yow pyntikna wa kiwa na Assam ym yoh ki wow psiah chapoh ka jylla kiwa ym toh kiwa da yoh bor kamjooh leh kiwa napoh ka jylla wym toh u lai ki cha Assam khamtam cha Guwahati.
Kam wow pynkynmoo wa ka jylla Assam da rai ko wow pynkrehkaam daka Lockdown wa 14 sngi ka wow sdang pyrdi synyaw ka 28 tarik hapoh ka Kamrup Metropolitan District neidaw wa ku kiwa yoh COVID-19 ha Guwahati kamjooh.
U Prestone da pyntip u leh wa u CS ka jylla daw thoh u cha waroh ki DC yow kyntu yaki paidbah wow dam u lai cha Assam lait noh yaki kaam wym hoi de u dam wei kiwa emkaam u lai cha Assam emkaam ki leh yaka NOC na ki DC.
