Ka VDP ka chnong Ladmukhla, West Jaiñtia Hills da pynche paidbah ko yeiwa em ki bru wa pynpoor ya i dur u bru deiwa pynbaad wa uni u bru toh u chohnoh wei uwa rahbor (Kidnap) ya ki kynthai deiwa riam kam ka kynthai wei kattæ da poor bha i ha WhatsApp wa ki Social Media.
Neiliang u President ka VDP Ladmukhla, u H.D. Shylla da pyntip u wa nadooh u bnai May uni u snem da em ki kynthai ka chnong kiwa chah bood ha uni u bru uwa riam kam ka kynthai deilang wa u sniooh (Wig) yong kynthai hadooh wa da tieñ ki.
Neiliang ka VDP da sdang ko wow thooh ya uni u bru nadooh kitu ki por wei da yoh leh wow yoo ya uni u bru lyngba ka CCTV yeini wa leh u.
Kamtæ ha ka 6 tarik uni u bnai da yoh wow kem ya uni u bru wei da lai rah oo cha Ummulong Beat House heiwa da wan leh ka bei wa u pa u wei da chem toh uwa sah ha Jowai wei heini i yaklam da chim rai wym e kti ko cha ka aiñ tangwa wow bichaar ya oo da ka chnong iwa da leh ha ka 10 tarik uni u bnai heiwa da em leh ka bei wa u pa uni u bru.
Hadien wa dep yei yaklam da chim rai wym pynchitom oo deiwa kular wym leh de u yeini deiwa kyrpaad leh ka bei u pa u neidaw wym em chait bha u khon ki.
Tangwa hadien ini wa bichaar ka chnong da sdang pynpoor ki bru yei dur wa kawi ka Video wa riñ da ka CCTV ha ka 5 tarik u bnai May heiwa da ong wa uni u bru uwa riam kam ka kynthai toh u chohnoh wei uwa rabhbor (Kidnap) ya ki kynthai.
Neiliang ka VDP ka chnong da ong ko wa ki bru da pynembakla ki yei dur wa i Video yow pynbaad ya uni u bru yei kaam wym em leh u.
Kamtæ da kyntu ya ki paidbah wow man kiwa husiar wym toh u pynpoor yei dur wa i Video iwa ye wow wanrah yei maa ya uni u bru kamjooh ka yung ka sem yong oo deiwa chah pynbaad thok u kamni.
Da kyrpaad ya waroh kiwa pynpoor yeini wow pyndooh pyndam noh ki wei wym toh de u leh yeini. Wei lada em kiwa dang pynpoor neini chakhmat daw e kti ki cha ka aiñ yow bichaar ya ki.
Discussion about this post