Kam chibynta wow yada ya u pood wa jrong 444 Km hapyrdi ka India wa Bangladesh khamtam ha kam kini ki por wa joor ka yakhih ha katai ka ri, neiliang ki Border Security Force (BSF) Meghalaya Frontier da pynjoor ki yei pait ya u pood.
Neiliang u Inspector General (IG) ka BSF Meghalaya, u Harbax Singh Dhillon da ong u wa iwa hakhmat dooh kattæ toh neibynta wow pyntikna wa kiwa lai puræ poi ki dei suk dei saaiñ cha India.
Da pyntip u wa nadooh ka 18 tarik uni u bnai, ki BSF Meghalaya da yarap ki ya 574 ngut ki nong India, 435 ngut kiwa na Nepal wa 8 ngut kiwa na Bhutan kiwa da psiah lyngba ka Dawki Integrated Check Post (ICP), West Jaiñtia Hills iwa dapoi 1017 ngut wei da em leh 18 ngut kiwa lai puræ hi ha Bangladesh ynne kiwa da psiah na ICP Kilapara, West Garo Hills District.
Da pyntip u leh wa yow yarap ya ki nong India kiwa psiah na ICP Dawki wa ICP Kilapara, da e leh ka umdih, ki song baam wa ki dawai dachin ya kiwa kjut wa chitom najrong wa yarap wow pynpoi ki cha ki thaw wa liwan ki.
Chooh chooh da ong u wa da antaad wa daw boon chooh kiwa daw yut na Bangladesh neidaw wa ka yakhih ym pu yoodur u duna i.
Da kular u leh wow yarap ya waroh kiwi na kiwi ri leh khamtam ki nong India kiwa psiah katkam ki kyndon chapoh ka ri deiwa pynrap wa da pynjoor leh u yada pyrchah ya kitu kiwa psiah pyrchah ya ka aiñ.
Discussion about this post