Kiwa yoh COVID-19 hapoh ka thaw sumaar North Eastern Indira Gandhi Regional Institute of Health and Medical Sciences (NEIGRIHMS) Shillong, Meghalaya da em ki 13 ngut katkam wa pyntip u Dr. P. Bhattacharryya, Director kani ka thaw sumaar.
Da pyntip u wa ynne da em sa 6 ngut kiwa da pyntikna wa yoh ki ya u COVID-19 heiwa na kini, 2 ngut toh kiwa wan na baar jylla yow chah sumaar ki katwa kiwi won toh kiwa em ha ka jooh ka Ward wa sumaar ya u BSF.
Da em leh ka wi ka wakreh hapoh ka NEIGRIHMS kawa ym em kreh ha ki bynta kani ka thaw sumaar wa ye ko wow yoh ya uni u khñiang wei yeini dang boodien yow pyntikna neiwon yabi ko. Wei kani leh man ko du ka samen ka wareh ha kani ka thaw sumaar wa yoh ya uni u khñiang.
Waroh kiwa em hei maa namo ki High Risk Contact da em ki 111 ngut katwa ki wym em ware hei maa namo ki Low Risk Contact da em ki 121 ngut.
Da pyntip chooh chooh wa da yoh yaka Result yong ki 30 ngut ynne heiwa da chem wa da em kini ki 6 ngut kiwa dang yoh.
Heiyatoh won yei chah pynbaad wa ka NEIGRIHMS ym em pynbiang ko yaki tiar yada namo ki PPE, da pyntip wa da bood yaki kyndon ka Ministry of Health & Family Welfare wei da e wow pynemkaam haki por wa emkaam.
Chooh chooh da pyntip leh wa ki wakreh ka NEIGHRIMS kiwa chah wow liwan toh kiwa ym em hei maa wa ye ki wow yoh ya u khñiang COVID-19 wei da e leh ya ki deiliang waka Certificate wow pynsakhiat ya ini.
