I yap ki bru ha Sikkim da poi cha 14 ngut hadien wa joor syndet u slap ynnin i step hadooh wa da chlai ka wah Teesta wei da pra leh ka Chungthang Dam wa em ha North Sikkim.
Katkam ka khubor wa da yoh, da em 102 ngut kiwa dang wiar chirup wa ki 22 ngut ki chipai ka India Army kiwa da chah ban ki kari wa pynemkaam ki hei ktieh.
Da em palat 22,000 ngut wa da chah ktah wei hadooh katni da em 2,000 tam kiwa da ye u pynlait da ki Indian Army, NDRF wei dang em chooh ki NDRF ki wow poi cha Sikkim.
Chooh chooh da em 26 ngut kiwa da mynsoo kiwa em hapyrdi i chah sumaar.
Ki bru wa mynsoo wa kiwa wiar toh na Chungthang, Mangan Dostrict, Dikchu, Singtam ha Gangtok District wa Rangpo na Pakyong District.
Chooh chooh da em 3000 kiwa uiñke suwari kiwa sahkut ha kylleiñ ka jylla.
Neiliang ka ka chnat Tourism & Civil Aviation ka sorkar Sikkim da kyntu ko ya kiwa uiñke suwari wym toh u wan cha Sikkim kat wym pu ye u pynbait pynkhooid ya waroh iwa da jia wei heiyatoh wa kitu kiwa dang sahkut khlem da yoh u mih napoh ka jylla, da pyntip wa ya kini daw sdang u pynmih ki nadooh ka 6 tarik lada chah ka suiñ bneiñ.
Discussion about this post