Jowai: Ka Jaiñtia Eastern College, wa em ha Khliehriat, East Jaiñtia Hills District ha kani ka kynti da dap 25 snem i chakri yaki paidbah ha i stat i tip kamtæ da sdang ko ya ka Jubilee rupa ynne ka sngi ha pchem ka college heiwa da wan wai ya ka da u MLA ka thaiñ u Justine Dkhar, ryngkat i emlang ka MDC ka JHADC ka Voilet Lyngdoh, u Deputy Commissioner East Jaiñtia u MS Lhuid, R.K.Pareek President JCMA Lumshnong wa kiwi kiwi.
“Ya kani ka college da sdang ha u snem 1992 ha Moowakhu Dkhiah West da ki kattu katni ki bru wa chynna jngai yei eh i khoo hapoh i yahkhmat u Rev. T. Dkhar uwa man kam u president wa u Rev. S.W. Lyngdoh kam u Secretary neibhah wa boon ki khynroo khyllood ki wym yoh laad u pteiñ yei puræ puthi cha baar, wei na i e mynsien lang ki manbei manpa da sdang yaka College lyngba 61 ngut ki khynnah wa 6 ngut kiwa sikai” da pyntip u Dr. P. Nongtdu Principal ka College uwa da khana ya ka parom yong kani ka College.
“Dap i mynsien dei sñiaw sarong wa ka college da lai ko kattu la 25 tylli ki snem heiwa na ki 61 ngut ki khynnah katni won da em palat chi hajar ngut ki khynnah wa 36 ngut kiwa sikai haka Arts wa Commerce Stream nalor 7 ngut kiwi ki wakreh, wei da ye u pynmankaam yeini da i yoh yarap poisa na ka Jaiñtia Cement Manufacturing Association, ki kattu katni ki bru samen” da khana u Dr.P. Nongtdu.
U kongsan ha kani ka sngi u Justine Dkhar hawa e i klam ha kani ka sngi da pynsñiaw u yei mynsien wa sñiawkmen wa ka Jaiñtia Eastern College da poi ko hadooh ini i kyrdan wow lehkmen Jubilee rupa yong ka, da ong u wa ymtoh man i iwa jem namo wa suk wow kynjoh yei rta wa 25 snem deiwa e yaroh leh ya kiwa pyllai ya kani ka thaw kamjooh kiwa sikai yong ka.
Da kyntu u ya ki manbei manpa wa kiwa sikai wow chdoohkti lang ki wa ka college ha iwon iwon i por hawa emkaam yarap kani ka thaw neibhah khlem kani ka College boon ki khynroo khyllood ym yohlaad ki wow pteiñ yei puræ yong ki.
U Deputy Commissioner East Jaiñtia u M.S. Lhuid da ong u wa ka college da kynjoh ko yaka 25 snem tangwa dang em chiboon i emkaam ko wow wanrah yei roi i paar hapoh ka thaiñ wa ka District waroh kawi.
U Justine Dkhar ha kani ka sngi da chim u leh yei bynta wow pynhær ya ka lama ka College, ka Balun wei wow ah ya u cake dap 25 snem kani ka College.
Ya ka yalang da pyllai da u M. Bareh uwa man leh kam u President Governing Body, da yoh i klam pdiang burom na u N. Rymbai, Secretary ka Silver Jubilee Committee, wa ki kyntien e khublei na u Dr. D.S. Diengdoh uwa man leh u Vice Principal wei da pynphooh ya ka yalang da ki rwai ki chaad, i lehke skit wa kiwi kiwi.
Discussion about this post