Ka Rotary Club Jowai kattu da kynjooh i lai luti yong ka cha u Moomer wa 29 tylli ki snem, kamtæ katkam ka rukom dustur yong ka Rotary of International ha ka sngi Thymbleiñ i janmiet ka 6 tarik uni u bnai, ki dkhot ka Rotary Club Jowai da yachem kyrpang ki ha Orchid Inn Bouquet Hall, Thadlaskein wei ha kani ka sngi da pyndep ki leh ya ka 29th Installation Ceremony hei sakhilang u PDG Rotarian Manas Choudhary wa kiwi ki Rotarian ka Rotary Club of Shillong wa kynthup yow Rtn. Barnabas Nangbah wa kiwi kiwi.
Ha kani ka janmiet ya ka yalang da kdar yahkhmat da u Master of Ceremonies, u Rtn. J.M. Pohsngap, PHF deiwa e kti leh ya ka bynta wa sah yong ka yalang ha u Rtn. Deibormi Toi, Outgoing President Rotary Club Jowai wei da pteiñ won ya ka yalang dei rwai ya ka National Anthem da waroh ki dkhot neitæ chooh chooh da yoh leh i klam pdiang burom da u Rtn. A. Andrew Shullai katwa ka Rtn. E.E. Laloo wa ka Rtn. E.F. Gatphoh chim ki ka bynta wow e burom ya u kongsan, u President, u Secretary wa kiwi kiwa embyntalang ha kani ka sngi.
U PDG Rtn. Manas Choudhary kam u kongsan yong kani ka yalang da pyndep u leh ka bynta wow pdiang yei psiah dkhot yong u Stanly Roy Mulieh wa u Ashish Kumar Singh najrong i pynskem leh ya kiwa yahkhmat ka Rotary Club Jowai RID 3240 neibynta ka samoi krehkam yong u snem 2024-25.
U Rtn. Rudolf E.Laloo, President Rotary Club Jowai hei klam da kdar u wow niawtang ya kiwa boon ki kaam kiwa ka Rotary Club Jowai da leh ko neibynta ka imlang sahlang wei da e khublei u leh ya waroh kiwa yahkhmat yong ka samoi krehkaam wa da lai kamjooh ya ki dkhot ka Rotary Club of Shillong kiwa da embyntalang na ki por cha ki por hei wow e bor e mynsien ya ka Rotary Club Jowai.
Kam uwa yahkhmat ka Rotary Club Jowai ha kani ka samoi da ong u iwa hakhmatdooh ka thong yong oo toh wow kreh yei kaam neibynta i miat i bha wei myntoi ka imlang sahlang kiwa man ha ki dur ki rukom waphær kiwa kynthup yei chait i khiah, i puræ puthi, i bynta wa yatoh waka Bei Ramaw neitæ wow thooh leh ki laad ki luti yow ye u pynboon ya ki dkhot ka Rotary Club Jowai wa kiwi kiwi ki kaam kiwa dawa u leh neibynta i burom ka seiñ waroh kawi.
U PDG Rtn. Manas Choudhary hei e kyntien, da kyrsu kyntu u ya waroh ki dkhot ka Rotary Club Jowai wow yakrehlang chirup da kawi ka sur kawi ka thong wei wow e leh yei por wa kordor u ya chongpyrkhat sani bha ya ki kaam kiwa toh u leh neibynta i myntoi yong uwa boon wa lang ymphær lada man i kam iwa heh næ wa khian.
Chooh chooh da khana bniah u leh yei yumut wa yaar yong ka phang Rotary of International ‘The Magic of Rotary’wei hajrong kani thong da kyrsu kyntu u ya ki dkhot ka Rotary Club Jowaiwow chimkhia ki kattu neini chakhmat u leh iyi ræ iyi i kaam khnang wa ki paidbah ka chnong Jowai u yoh ki u yoo u sakhi, i wow man leh i burom wa khroo ya ka Rotary waroh kawi.
Ki dkhot ka Rotary Club Jowai kiwa da pynskem ha kani ka janmiet neibynta ka samoi yong u snem 2024-25 man ki kamni ha wah:
- President: Rtn. Rudolf E.Laloo
- President Elect: Rtn. Reuveny Nongtdu
- Vice-President: Rtn. S.Kmenlang Lato
- Immediate Past President: Rtn. Deibormi Toi
- Secretary: Rtn. Montri Passah
- Joint Secretary: Rtn.Samehi Laloo
- Treasurer: Rtn. James Monroe Pohsngap
- Club Bulletin Editor: Rt. S.Kmenlang Lato
- Sergeant at Arms: Rtn. Mewothi Gatphoh
- Club Administration Chair: Rtn. December Four Majaw.
- Membership Chair: Rtn. Reuveny Nongtdu
- Rotary Foundation Chair: Rtn. Easter Flora Gatphoh
- Service Project Chair: Rtn.B.Paka Najiar
- Public Image Chair: Rtn. Dawan Biam
Discussion about this post