I chah thombor ki ar ngut ki manbei, wa kynthup ya ka President yong ka Civil Society Women Organisation, ka Agnes Kharshiing wa ka Amita Sangma ha ka chnong Chohchrieh, East Jaiñtia Hills, daw dap 3 snem kattu, tangwa kini ki manbei da pynsñiaw ki yei wym hun hajrong i takit wa laitlooid wa da thung da ka sorkar.
Ka Amita da ong ko wa ha ka 8 tarik u Khonchonglad (Nov) i chah thombor daw dap i le snem, tangwa da ong wa hadooh katni ym em iyi iyi wei da pynsñiaw ko leh yei artatien wow yoh ya i bichaar hok, deiwa pynbaad neidaw wa u Montri Rangbah ka jylla, u Conrad K Sangma emkti u wa ki bru yong uwa dat wa bom ya ki ha u snem 2018.
Da ong ko wa u Nidamon Chulet toh u bru yong u Conrad Sangma, uwa em hei thaw wa chah thombor, deiwa pynbaad chooh chooh wa u Conrad Sangma tip bha u katwon ngut ki bru yong oo kiwa emkti wow dat ya ki.
Ka Amita da ong ko wa hadien i jia, u Conrad da lai u wow pait ya ka ha Hospital, wei heipor wa kwah wow khana iyi iyi ya iwa jia neibhah wa man u kam u Montri Rangbah yow yarap, u Conrad da ong pathan u ham kana suki kiaw, iwa pynman ya ka wow suki noh ko, wei hadien da yoo wa u Nidamon Chulet da lai e yarap u T. 2 lak cha u Montri Rangbah lyngba ka Chief Minister Relief Fund yow yarap neibynta i yakhun ya u COVID-19.
Da ong wa hadien wa da yoo ha ki laad pathai khubor, da sñiawthooh ko wa ym yoh de yei bichaar wa hok mynnu mynnu leh neibhah itai i jia toh wa emkti da ka NPP, wei u Conrad Sangma da tip bha u wei katni ya itai i kaam da suki hi-eh u.
Ka Amita da ong ko wa u Montri Rangbah da tip bha u kiwon ki bru wa emkti wow thombor ya ki, heiwa da ong chooh chooh wa u Montri Rangbah leh toh u damok wa emkti lang neibhah wa yachah u ya kiwa dat bru.
Da ong wa i dawa hadooh katni leh toh wow pynchitom ya ki bru wa emkti, tangwa kamwa man katni da pynsñiaw ko yei dooh kyrmen deiwa ong wa katwa dang em ka sorkar NPP, kini ki bru ym chah pynchitom neibhah wa ka sorkar da toh ko ha ka poisa wei ym leh ko iyi iyi ya ki bru yong ka hi.
