U Montri Rangbah ka jylla, u Conrad K Sangma da ong u wym em kam katæ ka Work Permit neibynta ki bru kiwa wan kreh mylla na baar jylla, tangwa toh u booh pyrtuid næ leh Registration donhi wei yeini ye u leh ha ka chnat Labour ka jylla neibynta kiwa kreh mylla.
Ini i ong u Conrad toh wa kattæ ki seiñbhalang kam ka KSU da pynman ki yei kynreh ya ki baar jylla kiwa wan kreh mylla heiwa da ong wa toh u em ki ya ka Work Permit wa kiwi de kiwa emkaam.
U Conrad da ong u wa ka chnat Labour daw chim pyrtuid ko ya kiwa mylla wei wow e i chngaaiñ ya ki. Da ong wa toh i kaamram ki Contractor næ kiwa e kaam wow Register ya ki bru wa wanrah na baar.
Hajrong i kylli wei sylli ki seiñbhalang, u Conrad da ong u wa wym em e bor ya kiwon kiwon wow kynreh ya kiwa mylla wei ini wa leh ki seiñbhalang man ko pyrchah ya ka aiñ. Da khana u wa ki pulit da ujor mukotduma (Case) ki soo tylli hajrong ini i lai kynreh ya kiwa mylla da ki seiñbhalang.
Heiyatoh won wa i dawa pynkrehkaam ya ka ILP, da ong u wa ka sorkar ym pu ye ko wow leh iyi iyi neibhah wa dang em ha kti ka sorkar India katwa ka aiñ chongwai, ka Meghalaya Residents Safety and Security Act (MRSSA), 2016, ka sorkar ka dang puræ bniah ko neibhah em ki bynta wa ka sorkar India da phah ko wow bichaar biang.
Da ong u wa i lai kynreh ymtoh iwa miat wei man ko pyrchah ya ka aiñ wei lada em i chah tba kti ya kiwa mylla, ka aiñ daw leh ko yeiwa emkaam.
Chooh chooh da ong u wa lada u Contractor næ uwa e kreh lada ym bood ki ya ka aiñ wow e pyrtuid ya kiwa kreh, ki seiñ næ kiwon kiwon toh u ujor ki cha ka sorkar yow leh ko yeiwa emkaam.
Discussion about this post