Ka chnat Animal Husbandry & Veterinary kawa pait yei poor i kjut Lumpy Skin Disease (LSD) ha ki masi, da pyntip ko wa katkam wa chem katni wa ini i kjut da rap duna i.
Neiliang u Dr. P. Blah War uwa man u Assistant Director ka chnat AH&V (Disease Investigation), da ong u wa katkam ka Report wa da yoh, ini i kjut da rap duna ko lada nujor wa ki 2-3 sngi wa da dep, wei da khana u leh wa neiliang yong ka chnat da yaleh ko katwa ye yow yada nei poor ini i kjut.
Hawa yaklam wa kiwa thoh khubor da khana u wa da em hadooh 168 tylli ki Rapid Response Team kiwa kreh yow yada nei poor i kjut hanla hadooh katni ym pu em dawai neibynta itai i kjut.
Da ong u leh wa ha ki District ka Khasi wa Jaiñtia Hills da chah ktah awjan waroh kawi, wei kawa rap chah ktah bha toh ha Ri Bhoi, East Khasi Hills, South West Khasi Hills wa ha West Jaiñtia Hills.
Chooh chooh u Dr. Blah War da ong u wa hadooh ka 12 tarik uni u bnai da em kamwa 45 tylli ki masi kiwa da yap, wei kiwa boon toh hapoh West Jaiñtia Hills. Da khana chooh chooh u wa ya ki nongmuna (Sample) da phah wow pait bniah ha ka Laboratory kawa em ha Bhopal, wei pyntip u wa kamwa 6 tylli ki Sample da yoh Report wa em ya kani ka kjut, katwa ya ki Sample wa palat 60 tylli ym pu yoh ya ka Report.
Neiliang uni u heh kani ka chnat da ong u wa i dih yei dud wei baam yei doh masi ym em ktah ko tangwa hap wow chet bha, wei kyntu u ya ki paidbah wa ymtoh u khuslai ki neibhah kani ka kjut ymtoh kawa yabi cha ki bru.
Hawa yatoh wa i kjut African Swine Fever, u Doctor da ong u wa ini i kjut leh da duna i nadooh ka 2 tarik uni u bnai wei ym em de yoh Report wa em ki sñiang wa yap na ini i kjut.
