Ka seiñ A’chik Conscious Holistically Integrated Krima (ACHIK) da maham ki wow lai cha ka Supreme Court ka ri India lada dam u pynkrehkaam ya ka Roster System deiwa kheiñ nadooh u snem 1972 katkam wa da phah nyngkong ka High Court.
Heijooh i por da ong wa daw pynman yei yakhih wei wow lai cha ka yung bichaar wa hakhlieh dooh ka ri lada hadien ka Cabinet Meeting kamjooh ka yalang yong waroh ki Party da chim ya ka rai wa ktah ya ki Garo namo ki A’chik.
Da ban joor ki wa toh u pynkrehkaam nadooh u snem 1972 neibhah ya ka Reservation Policy da wanrah wow yabhah salonsar khlem da leh chiliang tangwa khlem em ka Roster System ini ym em man sakhiat i neibhah kut wa lait kreh nachwa boon da lai bait cha ki Khasi deiwa e nongmuna lada lait kreh 100 tylli, 90 tylli da lai bait cha ki Khasi katwa ki Garo da yoh ki 10 tylli.
Kamtæ da ong wa ini da jia i la 50 snem wei katni deiwa pynmih hukum ka High Court daw yoh noh ki Garo yei hok yong ki katkam ka Reservation Policy kawa da ong ko mar 40% ya ki Garo wa Khasi-Jaiñtia.
Ka seiñ ACHIK da lai pynman ko leh ya ki yalang paidbah kam ha Baghmara yow pynsñiawthooh yeini kamjooh yow dawa ya ka Winter Capital ha Tura.
