Ka India ha ka lympung yalehke Tokyo Paralympics hadooh ynne ka sngi da yoh ko hadooh 7 tylli ki takma wei du ynne da yoh ko 4 tylli ki takma.
Ynne kiwa yoh takma kynthup ki ya ka Avani Lekhara ha i siat suloi 10 m, u Yogesh Kathuniya wa da yoh takma rupa ha ka Discus Throw, u Devendra Jhanjharia wa yoh yakma rupa ha ka ha ka Javelin Throw wa u sundar Singh Gurjar uwa yoh takma tama ha ka Javelin Throw.
Ka Avani Lekhara (19 snem) da man ko kynthai wa nyngkong dooh na India wow yoh takma ksiar ha ka Paralympics Games. Ka Avani toh kawa da chitom ha u budloom hadien wa em ko hei ya tyrrah kari wa joor bha ha u snem 2012.
U Davendra Jhajharia (40 snem) toh uwa da dep yoh takma ksiar la arsien wei wa kani ka takma rupa da man u leh uwa boon dooh wa da yoh takma ya ka India ha ka Paralympics heiwa ha u snem 2004 wa 2016 da yoh u ya ki takma ksiar. U Jhajharia da dooh u ya ka kti tidiang u hadien wa toh tba u ya u sainar bordiñ heipor wa dang 8 snem u heipor wa dang ku dieñ u.
Kani ka lympung da sdang ko ha ka 25 tarik uni u bnai hadooh ka 6 Naikhynde 2021.
Kani leh man ko ka sien wa boon dooh wa yoh ka India ya ki takma ha kini ki lympung Paralympics.
Neiliang u Montri Rangbahdooh ka ri, u Narendra Modi, u President ka ri, u Ram Nath Kovind, u Montri ka sorkar pyrdi, u Kiren Rijiju wa kiwi kiwi da e khublei ki ya kini kiwa da yoh ya ka takma ha kani ka lympung ynne ka sngi.
