U MLA ka Mowkaiaw, u Nujorki Sungoh ynne hapoh ka yung dorbar da wanrah u ya ka phang yaklam hajrong i chah ieh beiñ ka Block-I kawa em hapoh ka Ri-loom Jaiñtia deiwa ong wa nadooh ki por warim leh em ko hapoh i synchaar u Syiem Jaiñtia kamjooh hapoh ka Ri 12-Dolloi tangwa da dooh noh ya ka chi bhah ha u snem 1951 hadien wa ka Assam da chna ko ya ka Mikir Hills kawa tip katni kam ka Karbi Anglong District heiwa ha ini da wiar ka Labang Nangphyllut waka Pangam Raliang napoh ri-loom Jaiñtia hapyrdi i pyrchah ki bru ha kitu ki por kiwa man ki jaitbru Pnar.
Da ong u wa kini ki bru da chah pyndik ki na ki por cha ki por ha ki pulit ka Assam ha ki Police Out Post wa da booh da ka Assam ha kini ki thaw.
U Nujor da ong u wa katni da dap 71 snem i chah pynchitom tangwa dang neh bait i mynsien kyrmen wa ki bru wa em ha Block-I daw yoh ki wow em biang hapoh ka jylla Meghalaya hanla chah ieh mylliñ ki wei ki boon jiat wa da hap maad ki hadooh ha ki kti ki seiñ wa kieñ suloi.
Da kdaw u leh yeiwa jia ha ka 20-09-20, heiwa ki pulit ka Assam wa rah suloi da psiah ki chapoh ka chnong Moolaber hei pyrdi synyaw wei da siat ki 50 kuli cha suiñ du wow pyntieñ ya ki bru. Ha ka 07-01-22 uwi u khynnah khynroo da lai u wow pynlang dieñ thangdiñ tangwa da chah kem u ha ki pulit ka Assam khlem iwon iwon i daw wei da pynlait ya oo du hadien wa tuklar ki bor District.
Da khana u leh wa hawa kit phlang, kit dieñ wa pynemkaam ki ha yung da chah toh dan ki khlem da e ya kawon kawon ka chalan iwa da leh da kawi ka Forest Check Gate wa booh da ka Assam ha Khlieh Sanaroo iwa jngai du 2 Km na chnong Mukroh.
Da kdaw u leh wa ha kani ka thaaiñ da em leh du kawi ka Sub-Centre wei da chakri ko ya ki chnong wa jngai hadooh 20 Km.
U Nujor da dawa u leh na ka sorkar wow chna ya u sarok Khatkasla-Moojem-Jrikyndeng Road wei uni toh du oo wa pynyabi ya waroh ki chnong wa em hapoh ka Block-I.
Ya kani ka phang wa wanrah da u Nujorki, da jubab da u Montri Rangbah uwa da ong wa hao em boon i eh hapoh ka Block-I wei kiwa chong chnong da hap ki wow maad chiboon.
Heiyatoh wa ki kaam pynroi da pyntip u wa da dep chna ya ka yung skur SSA ha Moolaber. I kreh ya u sarok wa jrong 15.517 Km da lai i chakhmat uwa em 13.397 Km hapoh Meghalaya wa 2.12 Km ha Assam uwa nadooh Mukroh-Umspar wa pynyabi wa u sarok Jrikyndeng uwa da chna hapoh ka North East Road Sector Development Scheme.
I chna ya ka skur RMSA ha chnong Psiar leh man ko kawa da jan dep kamjooh i pynchna ya u sarok na Lapangap cha Khanduli hapoh ka MGNREGA.
Ka PWD da siang psiang ko leh ya u sarok nadooh L042-Barato hadooh ka 18th KM u Kdiap-Lapyngngap-Barato (KLB) Road heiwa i kreh dang lai i chakhmat.
Heiyatoh waka umkor da pyntip u waka Rudumplu Combined WSS wa da pynlait poisa ha ka 16-11-21 hei dor wa T. 9.254 klur u man ko neibynta ki le tylli ki chnong Khanduli, Umlangshor wa Rudumplu heiwa ka Khanduli toh ka chnong wa em hapoh Block-I wei kani toh ka Pumping Scheme wei i pynkhreh yow sdang noh yei kreh da jan dep i.
Da em leh ka Lapangap Combined Water Supply Scheme kawa da pynlait poisa ha ka 26-03-21 hei dor wa T. 5.08 klur wei kani toh neibynta ki ar tylli ki chnong kitæ ka Lapangap waka Tahapatpnar wei kani leh toh ka Pumping Scheme wei i kreh da dep i hadooh 60%.
Ka Psiar Khatkasla Combined WSS kawa da pynlait poisa ha ka 17-12-20 hei dor wa T. 4.52 klur wei kani toh neibynta ka Psiar waka Khatkasla wei kani leh toh ka Pumping Scheme wei i kreh da dep hadooh 80%.
Ka Saba Water Supply Scheme kawa da pynlait poisa ha ka 11-02-22 hei dor wa T. 3.013 klur toh kawa neibynta ka chnong Saba kawa man ka Pumping Scheme wei i pynkhreh wow sdang yei kreh da jan dep i.
Ka Mukroh Water Supply Scheme kawa da pynlait poisa ha ka 16-11-21 hei dor wa T. 7.429 wei kani toh neibynta ka chnong Mukroh heiwa kani toh ka Gravity Feed Scheme wei i pynkhreh yow sdang kreh da jan dep i.
U Conrad da pyntip u leh wa em boon ki kaam ha kini ki thaw khappood wa hap u ya pynbait hapyrdi ki DC wa ki SP ki District ka Assam wa Meghalaya heiwa da dep chim leh ya ka rai wow neh kamjooh khlem pynhih namo ka Status Quo ya ki kaam pynroi wa da dep u kreh deiwa pyrkhat yei yaklam pynbait wa katni kiwa dang lai chakhmat.
Deiwa pyntip leh wa lada em ki kreh ka Meghalaya wa pynthut ka Assam, ka Chief Secretary da thoh bait ko cha ka Assam yow lait ki wow pynthut khamtam ki kaam wa daw myntoi da waroh kiwa sah ha ki thaw khappood.
Kamjooh leh da pynjoor yei lai uiñ sonteri ki pulit ka Meghalaya ha kini ki thaw yow pynchngaaiñ ya ki paidbah.
Heiyatoh wa i pynbait pood yong ka Block-I, u Conrad da pyntip u wa daw leh ha ka bynta wa ar namo ka Phase 2 yow pynbait sa ya ki 6 tylli ki thaw wa ya kajia waka Assam.
