Kawi ka khynnah wa tip kam ka Anjali kawa dang 3 snem da yap ko katwa kawi ka bru kawa 65 snem i rta da mynsoo ko hadien wa chah dait ha ki Suri ha Bahraich District ka jylla Uttar Pradesh (UP) ynnin i step.
Waroh da em 8 ngut wa yap heiwa 7 ngut toh ki khynnah wa 30 ngut wa mynsoo hadien wa chah dait ha ki Suri hapoh kani ka District la chi bnai chiteiñi wei ini da ktah ko ya 35 tylli ki chnong.
Ki bor District da yakhun pyrchah ki yeini deiwa pynemkaam leh ya ki Drone wa ki Thermal Imaging Camera yow chem wei yow kem ya kini ki Suri.
Ka bru wa 65 snem toh kawa da chah dait ynnin i step synyaaw wei da kit ya ka cha thaw sumaar wei ini da jia i hapoh u pood ka Hardi Police Station ha Mahsi, Bahraich.
Da ong wa kani ka bru da mih ko na yung wow lai mihlait wei heitæ kini ki Suri da khyrrup ki ka wei katni dang em ko hapyrdi i chah sumaar.
Ha iwi won i jia ha Mahsi ka Bahraich District hi, uwi u khynnah da chah pynyap u ha ki Suri katwa kawi won ka khynnah ka Anjali da wan dait ki Suri ka heipor wa thiah ko waka bei ko wei da patah ya kani ka khynnah cha iwi i thaw.
Manda khyrngiat ka bei ko, da sdang ko u kbai wei da mih ki paidbah wow thooh ya ka Anjali wei hadien kattu katni por da chem yei metyap yong ka ha kpær ki.
Ini i pteiñ i chah dait wei chah tynyap ha ki Suri da pynsyir i ya ki paidbah wei neiliang ki bor sorkar da thoohlaad ki kammon u yoh u kem ya kini ki Suri wei na ki 6 tylli dang yoh u kem du 4 tylli wei ka chnat Forest da sdang ko leh ya ka ‘Operation Bhediya’ wow kem lut ya kini ki Suri.
Neiliang ka chnat Forest da sdang ko leh wow thang da ki bomkala heipor miet yow pyntieñ ya ki Suri wow psiah ki chapoh ki chnong ki bru.
U Chief Minister ka UP, u Yogi Adityanath da phah u wow chimkhia yeini i chah dait ha ki Suri wei wow kem ya ki.
Discussion about this post