Jowai: Neiliang ka sorkar jylla da sdang pdiang biang ko ya ki bru kiwa neh cha kiwi ki jylla ka thaaiñ mihsngi (Northeast) ka ri deiwa booh ya ki thaw wow sylli yei man i long yong ki ha ki thaw wow psiah chapoh ka jylla wa em soo tylli heiwa ha East Jaiñtia Hills da booh ya ka thaw ha Ratacherra katwa kawi won ka thaw toh ha Byrnihat, Ri Bhoi District, Bajengdoba ha North Garo Hills wa Tikrikilla ha West Garo Hills.
Heiyatoh weini, neiliang ki bor District ka West Jaiñtia Hills heiyatoh wa kini ki bru kiwa da wan biang chapoh ki chnong yong ki kiwa em ha West Jaiñtia, da booh ko ya kawi ka thaw wow pynpsiah pyrtuid (Registration) wei kani ka thaw toh kawa em ha Highwinds, hajan ka Nan Thadlaskeiñ.
Ha kani ka thaw da pynkhreh ya ka yutip yong ki bru kiwa da paan bor wow liwan biang cha yung khamtam kiwa neh cha baar jylla (thaaiñ mihsngi).
Hawa yaklam wa u DC ka West Jaiñtia Hills, u Dykes LNS Garod da pyntip u wa hadooh ynne i janmiet kiwa da wan uiñ biang chapoh ka District da em ki 82 ngut wei kini da emkaam ki wow chong-kset (Quarantine) ha ki yung yong ki hi hadooh 14 sngi katkam i por wa da booh ka sorkar.
Chooh chooh u Garod da kyntu u ya waroh nadooh ki waheh chnong wa ki padbah wa chong chnong wow pdiang ya kini kiwa poi yung biang kamjooh ki bru ka sorkar kiwa lai e yarap ya ki khlem paitkhmat ya ki wei wow e mynsien wow kyrchaan ya ki kam ha kini ki por.
Heijoor i por leh da kyntu u ya kiwa dang wan yung wot, wow bood ki thij ya ki kyndon ka katkam wa da booh ka sorkar.
Discussion about this post