Ka Scheme saam um ha chnong Mihmyntdu, West Jaiñtia Hills District wa tip kam ka Mihmyntdu Water Supply Scheme, kawa da sdang pynkreh nadooh u Wisu (Mar) 2023 ha i lut wa Rs. 32 klur, da wanrah kyrmen i ya ki paidbah ka Mihmyntdu neibhah wa da kreh smat bha yeini.
Ki kreh kynthup ki nadooh ka Dam, Pump House, i thaw pynkhooid um ha wah Sakti, ki thaw pynlang um ha ki kyntoit waphær waphær, i taan ya ki Pipe cha man ki thlu yung wa kiwi kiwi.
Heiyatoh wa i kreh, ynne ka sngi u MLA ka 2-Jowai Constituency, u Wailadmiki Shylla da lai pait u yei kreh wa em ha wah Sakti wei ha kani ka jooh ka sngi da sdang pyrchang Pump næ taan ya ka um cha ki Sedimentation Tank wa da chna ha ini i thaw.
Neilang u Wailadmiki Shylla da pynsñiaw u yei kmen wow yoo wa da jop kani ka Scheme heiwa 95% i kreh toh iwa dadep wei i pyrchang pynpoi ya ka um cha ki Sedimentation Tank leh da man iwa lai bait.
Iwa dang sah katni toh wow Test ya ka Clear Pumping Water System wei wow Test ya ki Pipe pynpoi um cha man ki yung wa ki kreh wa khian.
Hajrong i smat i kreh ya kani ka Scheme da sñiawngooh u ya i krehlang ki chnat sorkar, kiwa kitkaam chnong wa ki paidbah yong ka chong Mihmyntdu neibhah wa kani toh ka bynta wow myntoi ka imlang sahlang.
Da ong u leh wa hanla ka jylla man ko kawa joor slap tangwa dei kreh chitom, i kreh da lai i chaaid chaaid.
Discussion about this post