Ki jait sim wa heh wa baam ya ki doh wa da yap da pyut wa tip kam ki Syngkni, da wan hiar ki ha chnong Demthring, West Jaiñtia Hills District la kamwa ar tayaaw haroh wei neidaw wa wan dem ki hei thaw u Kordor Pohsnem wa em hajan ka laad wow lai cha Demthring ha i bynta u sarok Jowai-Dawki, kini ki Syngkni da khriñ haroh ki yaki paidbah wa lai luti, kiwa uiñ suwari na baar ka jylla wow hiar ki ha kani ka thaw yow chondur riñ dur kamjooh u e baam ya kini ki sim.
Hajrong i wan dem kini ki Syngkni, neiliang ki bru ka chnat Wildlife, West Jaiñtia Hills Jowai leh mar ya yoh yutip na kiwa yahkhmat chnong Demthring haka 2 tarik uni u bnai, man-ka-sngi da em bait ki bru ki ha kani ka thaw yow e yada ya kini ki sim na ki bru wa chim kabu, heijooh i por yow kyntu ya ki paidbah wa paitke wym toh u tia ware ki chajan yow lait na iwon iwon i jia.
U John Lyngdoh uwa kreh ka chnat Wildfile kam uwi wa da e bor yow yang ya kini ki Syngkni, da khana u wa poi ki heini i thaw man-ka-sngi nadooh i por step wei liwan won ki hei janmiet wei da chem won wa da ku lut ki chajrong ki dieñ wa em ha kani ka thaw.
Da khana u leh wa kani toh ka sien wa ar wa poi kini ki Syngkni ha kani ka thaw, itæ toh ynnin u snem 2022 poi ki ha u bnai March (Wisu) kamwa hapoh 23 tylli wei neidaw wa smat hiar slap tæ neh ki du kamwa chi tayaaw.
Hei sngi kini ki Syngkni hær wei dem ki ha ki loom wa em ha kani hi ka thaw, lai baam doh haroh ki cha ki thaw ah doh wa em ha kani ka chnong, wei ha uni u snem da antaad em ki waroh kamwa 38 tylli.
Da sakhi wa em ki bru hei thaw u noh ki yei jait doh wym hoi u baam, da wan e khnang noh ki cha kini ki Syngkni wei kini ki Syngkni leh da yaknieh ki wow yoh bynta baam lang yei doh.
Hei yaklam waka Divisional Forest Officer Wildlife, Jowai, ka N. Laloo, da khana ko wa kini ki jait sim Syngkni toh kiwa jooh yut na kawi ka thaw cha kawi won ka thaw ha kam kini ki samoi wei da tip leh ya ki kam ki Himalayan Griffon Vulture.
Hajrong wa neiwon wan kini ki Syngkni ympu tip, tangwa neilang ka DFO u pyntikna ko wa daw pteiñ chooh chooh ki wow e yada kat wym pu yut ki.
Heijoooh i por pynsñiaw ko leh i kmen wa yoh ki yei yakrehlang naka chnong Demthring kamjooh u tre thaw wa chong wa sah kini ki Syngkni.
