Jowai : Katkam ka yutip wa da yoh na u waheh chnong ka Dorbar Chnong Mynska, West Jaiñtia Hills u ma Mihsalan Lamare da pyntip u yei sñiawkhia ka chnong hadien wa chah thok ki paidbah haki bru kiwa da booh wow wan chondur Aadhar haka 12 tarik uni u bnai.
Neiliang u ma Lamare da ong u wa hadien wa da pyntip wei da phah wow e wyrta hapoh ka chnong wa daw wan chondur Aadhaar hapoh ka chnong Mynska u man ko haka 12 wa 14 tarik neiliang ka Dorbar Chnong da pynbna paidbah, wow ya wan khlem pep cha ini i chondur.
Kamtæ haka 12 tarik ki paidbah, kynthai wa chynrang kamjooh ki khynnah skur wa kiwa em cha kiwi ki thaw da wan ki cha ini i thaw wow chah chondur, tangwa ki paidbah da haap ki u yang nadooh 9 waje i step hadooh 1 waje i sngi hadooh wa kiwa kreh ka Block Office da wan pyntip ki wa kiwa chondur ym ye ki u wan na ki daw wym tip.
“Ini i chah thok, da pychrai ko ya ki paidbah neibhah da wan pynsepai hi-eh ki yei por yong ki waroh chi sngi, wei da chah thok ki kattu la le sien” da ong u ma Lamare.
Kamtæ ka Dorbar Chnong Mynska da dawa ko wa kam ini i chah thok ki paidbah ymtoh de u jia i neini chakhmat neibynta i bha i miat ki paidbah.
Discussion about this post