U George Lyngdoh, MLA ka Umroi ynne hapoh ka Yung Dorbar da kylli u chaphang i thmu ka sorkar wow booh Casino hapoh ka jylla khamtam ha Ri-Bhoi wa da mih i pyrchah na kiwa boon heiwa u Montri wa pait ya ka chnat Law, Taxation wa kiwi de da jubab u wa ka sorkar toh kawa pait yei roi ha waroh ki liang wei kwah ko wow wanrah ya kiwa uiñke suwari kiwa rap phær yow ye u yoh kreh kiwa chong chnong kamjooh wow pynku ya ka yoh ka kot ka jylla hi waroh kawi yow ye u pynemkaam ya kani ka poisa ha ki kaam wa yatoh wa i chait i khiah, puræ puthi, ki luti syngkieñ wa kiwi de.
Da ong u wa ka Meghalaya toh kawa da kyrkhu hei miat ki chnong ki thaw tangwa kiwi ki jylla leh da sdang ki wow taan ya kiwa uiñke suwari neibhah ki jylla ka thaaiñ ya sariem ki hei rukom man ki loom ki wah tangwa kiwi ki jylla em ki ya kiwa da tei u warim wa jah wa kiwi de ki jait, kamtæ ka sorkar da hap ko wow thooh laad da kawa rap phær neibynta kiwa uiñke suwari kiwa rap phær.
Kamtæ da ong u wa lada ong ym em kitæ ki yalehke yakhle hapoh ka jylla Meghalaya man ko kamwa len i ya idæ neibhah ka yasiat tim da tipmit da ka aiñ nadooh u snem 1982 wei chwa u tipmit da ka aiñ leh da em ko kylleiñ kylleiñ wei kani ym toh kawa ye u khang.
Da em leh kiwi ki jait yathong kam i yadaw masi hanla da khang da ka aiñ wa kiwi de kam ka khruk-khruk toh kiwa da em ha ki chnong ki thaw ka jylla.
Da kdaw u leh wa kiwi ki jylla kam ka Goa waka Sikkim da tipmit ki da ka aiñ ya ki kaam yakhle hapoh ki jylla ki deiwa khang ya ki tre jylla wow psiah ki cha kini ki thaw yakhle iwa da yarap wow pynku yei yoh poisa ki heiwa da wan hadooh ki bru kiwa na baar ri cha kini ki thaw.
Da khana u wa hapoh ka Meghalaya Regulation of Gaming Act & Rules da kdaw che wa du kitu kiwa em ya ka ID wa pynyoo wa ki toh kiwa na baar jylla kiwa daw yoh u psiah cha kini thaw yakhle.
Da pyntip u leh wa da pynkrehkaam ya ka Meghalaya Gaming Commission deiwa thung da u Judge wa da chong ngiah kam u Chairman wa uwi u dkhot uwa da tip bha chaphang ini i kaam wei sa uwi ym pu em u thung.
Da pyntip u leh da paan yei e buit wa i pynsñiaw ki paidbah iwa da booh ha ki kot khubor heiyatoh wa kani ka aiñ wei ym em kiwa wan chakhmat wow ong iyi iyi leh kamtæ ka sorkar da lai ko chakhmat yow pynkrehkaam ya ka aiñ.
Da ong u wa ki paidbah ka jylla daw yoh myntoi ki ha kiwi won ki liang nei wan kini ki bru kam ha ka kamai kari, ki dai baam, dai that, dai tiar wa kiwi kiwi.
Heiyatoh won wa i e License yow booh thaw yakhle, u Montri da pyntip u wa da em boon kiwa yaleh heiwa 3 tylli toh iwa da lai chakhmat wow pait ya ki kot ki sla ki wei da e ya ka Temporary License cha ki.
Heiyatoh won wa lada da sdang i chna ya kini ki thaw, u Montri da ong u wa ini chong ha kiwa yaleh License wei ka sorkar ym toh ka kawa daw pynlut poisa yow chna ya kini ki thaw.
U George da e u yei jubab wow kyrpaad ya ka sorkar wow pyrkhat ko ya ini wa thmu ko deiwa pyrkhat yei sñiaw ki paidbah.
