Ka lyngkhuh snem thymmai Khasi la rakhe ha ka por miet jong ka 4 bad 5 tarik u Naiwieng, 2021 ha ïing jong i Ma Spiton Kharakor ha Nongkseh. Ha ka miet shiteng synñia baroh ki ba la don lang ha kata ka sngi rakhe, ki la ïa shim bynta ban tbeh jingshai ïa u snem thymmai ba la lam khmat da i Ma Spiton Kharakor, Bah Herman Nongrum bad Bah Raphael Warjri, khliehduh jong ka synjuk ki barikor Khasi-Riti Academy of Visual Arts, Shillong.
Ha kane ka jingrakhe i Ma Spiton Kharakor i la batai bniah ia ka jingshem jongi ha ka ba tih sani bad pynurlong ka jingthmu kum ban ainguh ainam ia u paralok jongi u ba la khlad noh, i Bah B Nishan Wahlang (Bam kwai ha dwar u Blei). Ka la jia ha ka 23 tarik Naiwieng, 2018 ha ba i Bah Herman Nongrum i la pur khana ha kata ka sngi lyngkhuh snem iap ba-ar jong i Bah B Nishan Wahlang ha ka shlem treikam jong ka Riti Academy, ha ka ba la don lang ki rangbah kum u Bah H S Shylla (Bam kwai ha dwar u Blei) bad i Bah Bindo M Lanong ryngkat kiwei kiwei ki rangbah bad longkmie na ka kur Wahlang bad kur Warjri.
Mar ïa dap shiteng synñia la pynkhreh ban thang da ki dongmusa kum ka dak ban pdiang ia u snem thymmai. Ka long kaei kaei ka ba sngewphieng ban shahshkor na ki kyntien jong i Bah Herman Nongrum ha ba la kren mardor ïa ka khana halor ka tipbriew tipblei jong ki paidbynriew Khasi ba la kyrpad ban thoh, ha ka ba la bynshet kylliang pat ban thwet ïa ka snem thymmai jong ki paidbynriew Khasi.
Ka jingïakren ka long ka ba byllai, ba kynsai bad ba jylliew, hynrei ka ba kongsan tam ka long ba i Bah Herman bad i Bah Nishan Wahlang ki la kular ba dei ban smai man la ka khep ba rakhe snem thymmai na ka bynta ban long tipbriew tipblei. Kata ka jingkren ka la shon ha dohnud jong ki ba la ïa don lang ha kata ka sngi khamtam kum ha kane ka juk ba la hiardor ka akor longbriew manbriew.
Kumta ka snem thymmai Khasi kan long ka jingkyrsiew ia ka imlang sahlang ban long ki ba tipbriew tipblei barabor ha la ka jingim ha ka imlang sahlang.
Ka kynti ka la don naduh ki snem ba la leit, la iathuh u Bah Raphael Warjri ha ba u Bah A B Hynñiewta u la thoh kawei ka kot halor ka rukom kheiñ sngi kheiñ ïa ki Khasi katkum u bnai bneng. Katkum kata ka kot ki longshwa manshwa Khasi ki kheiñ khatlai bnai shi snem, arphew phra sngi shi bnai bad phra sngi shi taïew. Ka jingshem jong i Ma Spiton Kharakor ruh ka byrshem hangta bad la nang tih nang thwet shuh shuh haduh ban da urlong ka jingthmu ban pynmih ka Almanak Khasi ba khatlai bnai shisnem ka ba la pyrshang ban pynphuh pynphieng man la ka lyngkhuh snem ba rakhe ia ka sngi mih bnai nyngkong jong u snem thymmai.
Ha ka imlang sahlang la kham jwat ban iaidlait na ka Almanak na shiliang duriaw (Gregorian Calendar) ka ba la pdiang salonsar ha satlak pyrthei kynthup ha Ri Khasi. Hynrei ka long ka ba donkam ban pynneh ïa ki snap jong ka riti tynrai Khasi, bad la duriap bad buddien ïa kata ka kam bah jong ka jaitbynriew da ka Riti Academy.
Ha ka jingïakren ha kata ka rakhe sngi lyngkhuh snem la shim ka rai ban thaw da kawei ka lyngwiar kyrpang ban pyrkhat sani halor kane ka jingrakhe man la u snem.
