Shillong: Kiwa sikai hapoh ka lama ka Meghalaya SSA School Teachers Association (MSSASTA) da rai ki wym yaleh de ya ka exam ka D.El.Ed (Diploma In Elementary Education) hadien wa ki mark ki neh ki kamjooh wot lada da yaleh ki ya ka jooh ka exam kattu la soo le sien leh.
Kini kiwa sikai da pynman ki ya ka chong kylleiñ myngor wa i rah Placard ynne ka sngi ha khmat ka Additional Secretariat Shillong wow dawa wa ka sorkar wow pynkut noh ko chi syndon i krehkaam waka NIOS neibhah ka leh kulmar ko cha wa palat yei rukom pynlai exam hadooh wa da wanrah ko ya i kulmar ya kiwa sikai.
“I dawa wa ka sorkar wow sangeh noh ko wow krehlang waka NIOS wow pynman ya kani ka exam neibhah da ngiah ya i rukom krehkaam kani ka tnat ka sorkar India hadooh wa da wanrah ko ya i eh i khoo wa ha rukom”, da ong u President ka seiñ u Aristotle Rymbai.
Da ong u wa “Em kamwa 900 ngut kiwa sikai kiwa yaleh ya ka jooh ka exam la le hadooh soo sien tangwa ki marks neh ki kamjooh iwa pynyoo ym em chimkhia kiwa pynlai ya kani ka exam.”
Katkam ka yalang wa pynman da e por wa khaddooh ya ka sorkar da kut ko ynne ka sngi wow pynkut noh ya i krehkaam wa sorkar waka NIOS wei lada ym yoh ya ka jubab wa biang daw pynjoor chooh chooh ya ka yakhih.
U Aristotle da ong u wa kiwa sikai wa em 4835 ngut kiwa yaleh ha ka 1st batch yong ka eksam pynbniah ha u snem 2013-14 wei na kini da em sa kamwa 900 ngut kiwa dang kulmar ya ka result neibhah wa e kulmar ya ki marks ka NIOS.
Da ong u leh wa ka 2nd Batch kiwa sikai wow yaleh ya ka exam em ki 3437 ngut kiwa da pyndep ya ka snem wa nyngkong wei dang sahkut neibha waka NIOS ym ye ko u leh yeiwa emkaam kawa toh u pyndep ha u snem 2016.
Da pyntip u leh wa boon ki bakla ka NIOS nadooh i rukom e marks, i pyrtuid ki bei ki pa wa i thaw sah.
Discussion about this post