Ka Meghalaya Pradesh Congress Committee (MPCC) da beiñ joor ko yei chah thombor ki yungmane yong ki Christan wa i chah tympra ki yungmane wa ki tiar ki tar wa khooid wa kyntang ha ka District Narayanpur ka jylla Chhattisgarh.
Hawa klam wa ki laad pathai khubor, uwa e ktien yong ka Congress ha ka jylla, u Ronnie V Lyngdoh da ong u wa neiliang ka Party ka kyntu ko ya ka sorkar India, ka sorkar ha Chhattisgarh wow pynchitom deiwa eh ya ki damok wa emkti.
Hawa kylli, u Ronnie da ong u wa hadooh katni ym ye wow pynsakhiat wa emkti ki seiñ saiñpyrthai hawa yatoh wa i pyrchang leh embor ha ka niam, tangwa kamwa da yoo wa i long i man ha ka ri, ka sorkar ym jooh beiñ ko hawa jia kiwon kiwon ki kaam wa kam kini wei wei ini da nang pynchlur chooh chooh ya ki bru wow beiñ wei wow pynbaad khamtam ya ki khian paaid.
Uwa yahkhmat ka Congress da khana u leh wa ka Party da dep ko wow thoh cha u Montri Rangbah ka Chhattisgarh wa ka sorkar toh u pynchitom ya ki damok wa emkti wei kamjooh wow e yei yada ya ki khian paaid ha katai ka jylla.
Hawa kylli chooh chooh, da ong wa ki khian paaid ha ki jylla wa synchaar ka BJP da hap ki wow chah yei eh wei lada ki paidbah ka Meghalaya biej ki wow jied ya ka BJP da mut wa ki da pdiang ki yei thombor ya ki khian paaid, tangwa heijooh i por da pynsñiaw u wa em i kyrmen wa ki paidbah kani ka jylla daw kyntait ki ya ka BJP neibhah ki kwah ki wow chongsuk chongsaaiñ.
Hawa yatoh wa i phah thooh yutip bniah da ki pulit Assam yei em ki Christan ha Assam wa kiwa da emkti wow pynkylla niam, u Ronnie da ong u wa lada u Montri Rangbah ka Assam u kyntait u wym tip u wa em kam katai ka hukum, da mut wa u Montri Rangbah ym em u yei kitkhlieh, neibhah kammon uwi u sahep sorkar ye u wow chim rai khlem da tip ka sorkar.
Puræ leh: Chah leh pynsih ka yungmane Catholic wa em ha Chhattisgarh
