U State President ka NPP Meghalaya, u Prestone Tynsong hawa klam haka yalang yalap Election ka Party ha Ladthadlaboh, Jowai haka 2 tarik, da ong u wa lada toh wa chah ka aiñ næ ka Constitution ka ri India wow e laad ya ki bru heh nia wow synchaar ki tang chi bnai kamwa jia haka phlim wa tip kam ka Nayak heiwa uwi u bru da yoh laad u wow man kam u Chief Minister chi sngi.
Da ong u wa ha kani ka phlim, uni u bru da kem u naphang ya ki bru hadooh wym em thaw de hapoh Jail, wei lada chah ka aiñ, toh u e laad chi bnai lym khang lut ka yaaw ha Jowai neidaw wa mih itæ i kyntien maya jaitbru.
Da ong u wa ya kini ki bru wa kam maya jaitbru ym pu em yoh jubab u na ki wow pynyoo ki ya ka Blueprint kammon pynkhreh ki neibhah i waroh chwa u chna yung da dro dur kammon u chna nadooh katwon kamra wei u paya wa katwon u heh neibhah lada chna yung soo san mala ha u paya wa ye u chah du chi mala da haap bait cha madan.
Tangwa da jubab ki wym bien ki u pynyoo wei ym yoo biang ki oo neidaw wa da rim palat u, heiwa u Prestone mynjur u wa da rim neibhah u sñiooh leh da haap tangwa utu won uwa ong hadooh katwon thymme u neibhah da jooh man MLA lang nadooh u snem 2013.
“Iyi wa da leh phi, jubab yeini,” da ong u Prestone deiwa pynrap ham ya bakla ya ki khon khynroo yong i.
Da ong u leh wa ha Jowai da sñiaw yeitæ i chongchit Prah tangwa chong chit ki ha kawon ka yurim, pynyoo ya ka yurim wa biang ymtoh wow chim kabu yei chit mynsien ki khon khynroo khyllood.
Da ong u wa kiyi wa nood u tba yaka phang pynbait pood lym toh ka NPP, ka Them Metor ka wym jooh em wa nood u tba da leh ka NPP kawa dang sah sa u pynkut.
Da kdaw u yaka Khunduli, ka Psiar ki wym jooh em wa nood u yaleh pynbait, du ka NPP donhi wa nood neibhah kani ka rai toh kawa eh dooh wow pynbait pood tangwa ka NPP lai ko chahkhmat wei na ini i daw ka NPP chah kawang moo ko ha man ka Election.
Discussion about this post