U Principal Secretary ka chnat Health & Family Welfare ka sorkar Meghalaya ha ka 3 tarik uni u bnai da phah u wow pynmyllien yei phah leh ya ka Rapid Antigen Test (RAT) ha ki PHC, CHC wa ki thaw sumaar ki bru samen deiwa e nongmuna wa katkam wa da chem ha South West Khasi Hills wa deiwa Test khlem hoi u dam ya kiwa wan phah sumaar ha ki PHC wa ki CHC da yarap ko wow chem ya kiwa rah ya uni u khñiang heiwa ha iwi i chnong da chem hadooh 80 ngut kiwa yoh ya uni u khñiang deiwa booddien hadien wa dep leh ya ka Test.
Hajrong kani ka yurim da phah wa ym hoi u dam u Test da ka RAT ya kiwa wan cha ki kini ki thaw sumaar. Heiwa deiwa leh kamni daw ye u chem smat ya kiwa em ya uni u khñiang wei wow e sumaar smat yow khanglaad yei poor u khñiang kamjooh yow pynduna yei em kiwa yap.
Hajrong ini, ka JSU da phah chithi ko cha u Montri ka chnat i chait i khiah yow pyrchah ya ini i phah Test deiwa ong wa boon ki bru wa em boon ki jait chitom daw dam noh ki wow wan cha ki thaw sumaar wei daw lai noh ki cha ki Kabiraj wa kiwi ki jait sumaar kiwa ym biang iwa daw ktah joor ya kiwa chitom kamjooh wow poor chooh chooh u khñiang deiwa yoh yei sumaar wa bakla. Wei ini leh daw pynchlur i yei dai ya ki dawai khlem da tipmit ka sorkar lyngba ki Black Market.
Chooh chooh da ong wa ha ki thaw sumaar ki bru wa samen, daw pynkhia ko ya kiwa chitom deiwa hap u pynlut poisa lada hap wow Test khamtam ya kiwa dooh wa duk wei kini ki thaw sumaar ki bru samen leh chem chitom wow noh ya ki jakhlia wa mih hadien wa dep Test.
Kamtæ ka seiñ da ong ko wa toh u Test du ya kitu kiwa em ki dak ki chin wa chitom wei toh u leh yeini dei mynkna iwa daw yarap u pynduna yei lutphut ki bru.
Heiyatoh won wa i Test paidbah ha ki chnong ki dong, toh wow leh du ya kitu kiwa em hei maa namo ki High Risk Contact katwa ya ki bru paidbah won toh dei mon ki bru ym toh dei pynbor deiwa ong leh heijooh i por wa emkaam wow Test ya kiwa boon ki paidbah neibhah ini toh iwa emkaam yow chem smat ya kiwa chah ktah tangwa ym toh wow pynbor.
