Ka All Meghalaya Joint Action Committee of Commercial Vehicles (MJACCV) da pynsñiaw ko yei pyrchah joor hajrong i phah ka Deputy Commissioner ka East Khasi Hills wow biah ya ka Vaccine Certificate wa da dep chim yei tika ha ka yit kari, wei da pynsñiaw wa lada ka sorkar wa ki bor pynlai District chah ki wow kamai kari, toh u chah ki ya waroh kitu kiwa da su hadooh phra jait ki dan, tangwa ya kitu ki wym su ya ka dan chong ko hei bor yong ka aiñ.
U Chairman ka MJACCV, u Wandonbok Jyrwa da ong u wa neiliang yong kiwa yah kari da kyntu ki ya ka Deputy Commissioner yong ka East Khasi Hills wa ym toh wow pynbor wow chim tika neibhah wa chong i mon yong samen, wei neiliang ka Joint Action Committee da kyntu ki leh ya ka DC wow pyndam noh chwa ya katai ka hukum.
Da pyntip leh wa ha ka yalang wa da yachem wa ki bor pynlai District ini wa dep, ym em iwon iwon itæ i rai wa ka yung krehkaam u District Transport Officer daw pynman ko yei e tika neibynta kiwa yah kari, tangwa katni da yoh yutip wa daw em kam itæ.
U Jyrwa da ong u leh wa neiliang ka Deputy Commissioner da pynbor ko wow chim tika, wei ka hukum wow biah ya ki Vaccinationa Certificate hapoh kari u man ko kam ka Permit yow yoh kamai ya ki kari. Neiliang kiwa yah kari smat ki wow lai chim tika, tangwa u chim ki wa katai toh ka Permit wym su de ya ka dan cha ka chnat Transport, deiwa maham leh wa lada ym man kamtæ, ka seiñ da maham ko ya kiwa biah ya ki Vaccine Certificate wa da dep chim tika.
Ha i jooh i por neiliang ka MJACCV da kyntu ko leh ya ka DC wow bichaar biang ya i rai wa da pynmih, hajrong i wym chah wow lai na kawi ka chnong cha kawi won, neibhah hadien wa da pynlait 25% wow kamai ki kari, da booh hei eh ya ki na ini iwa da phah.
U Jyrwa da ong chooh chooh wa ha ka sngi Thohdieñ ka seiñ daw lai ko wow yachem biang ya ka DC wa lada ka sorkar ym chimkhia ko, ym yohsa ki wow yaleh pyrchah ya ka hukum yong ka sorkar.
