Jowai: U montri ka chnat khloo yong ka sorkar jylla u Lahkmen Rymbui da kyntu u yaki paidbah wym toh u pynyap khiar ya kiwon kiwon ki jait mrad neibhah wa ki leh toh ki jait wa chna kyrpang u Blai wei toh u yoh bynta ki u im. Heijooh i por ki bru ym toh u sñiawthooh bakla ki leh wa du neidaw wa pynyap mrad te chah kem.
Ong u wa lada em kiwon kiwon ki mrad wa wan pynsih pynpra ya ki mar rep, ki yung ki sem, toh u wan ujor chaka sorkar ym toh wow pynyap yaki, neibhah em ki laad e yarap wa ye u yoh naka sorkar hajrong iwon iwon i chah pynsih pynpra.
Yeini u Lahkmen Rymbui da klam u ynne ka sngi haka yalang pynkut yaka tayaw lehkmen Wildlife Week wada pynman ha chnong Chyrmang, West Jaiñtia Hills District, heijooh i por da wai u leh yaka Community Hall Cum Nature Interpretation Centre yong ka chnong Chyrmang.
Chooh choh hawa e yei klam ong u waka jylla yong i toh kawa embhah wei mahajon tam lyngba i em ki khloo, ki mrad, ki sim wa boonjait, wei i daw wa ka sorkar kwah ko u pynneh yaka rymaw toh wa e ko yaka la-ær wa khooid, pynim ko yaki umbam umdih, e thaw rieh ko yaki mrad, e ko ki soh ki jhoor, ki dawai dachin wa waroh i emkaam u bru.
Ong haroh u wa i pynneh pynsah yaka Khloo Blai ha kani ka chnong toh wa ki waheh wasian sñiawthooh ki wa kam ki bru wym ye ki u im khlem ki khloo ki mrad, emkaam i yada kylliang, heijooh i por ki khloo ki mrad man ki kam ka pliang ja yaki bru neibhah lyngba yong ki ye leh u pynku yei kaam uiñke sawari.
“Kamwa tip wa em boon ki khloo yong ki bru samen, ki khloo chnong bar yaki khloo sorkar haka jylla tangwa sñiawkmen leh wa em kam kini ki Raij wa e yaki khloo yow sumaar i dei ya krehlang chirrup,” ong u Lahkmen.
“Ka sorkar ym em poisa ko wow thied khloo, kamtæ katkam i yachem yumut wa kiwi kiwi ki chnong wa toh u e laad ki yaka sorkar u ya krehlang ko wow sumaar yaki khloo neibynta u pynheh pynkmai. Kamwa man kani ka khloo ha chnong Chyrmang leh sñiawburom i yaki waheh wasian nachwa wada sumaar wei e yada ki yaki mrad”.
Ha kani ka sngi da emlang leh u B.K. Lyngwa IFS Principal Chief Conservator of Forest & HoFF Meghalaya, u H.C. Chaudhary Additional Principal Chief Conservator of Forest (Wildlife) & Chief Wildlife Warden Meghalaya IFS, u Superintendent of Police West Jaiñtia Hills u B. Marak, u K. Lakiang Chairman Management Committee Khloo Blai Seiñraij Kongwasan Chyrmang Committee Reserve, u Dolloi ka Elaka Jowai Puramon Kynjiñ wa kiwi haka yalang wa pynlai daka H. Lato MFS, Divisional Forest Officer, Jaiñtia Hills Wildlife Division Jowai.
Ha kani ka sngi da pynlait leh yaka kot wa da thoh chaphang ki jait sim waphær waphær wa em hapoh Ri-loom Jaiñtia, da pynlait yaka poster, ka Video wada riñ haki Reserve Forest næ ki khloo wada pynneh pynsah kyrpang wei heijooh i por da saam leh yaki Prize cha kiwa jop haki yakob waphær waphær wada pynman daka chnat Wildlife.
