Ka mukotduma PIL ka Synjuk ki Waheh Chnong Jowai da chong bichaar biang ya ka ynne ka sngi da ka Meghalaya High Court heiwa da pyntip cha ka yung bichaar wa da yoh yei thaw wa chipor yow noh yei jhep heiwa yei jhep leh da sdang wow kit wa sahkut ha chnong Jowai.
Ka Jowai Municipal Board da pyntip ko leh wa i jhep wa sah cha rood sarok da dep kit wei i jhep wa dang sah ha ki thaw wa pynman yaw daw kit pyn ha kani ka tayaw hi.
Kamtæ ka yung bichaar da ong ko wa da yoo wa da em i ya krehlang wa kynthup ya ka sorkar wa da pynman ya ki yalang yow jied thaw noh jhep wei na ini i daw ym em pynmih hukum wa thymme wei daw yang artyaw yow pait kammon deiwa yooluti wa ha ini i por daw ye u pynbait khaddooh ya ini i kaam.
Neiliang ki 6 tylli ki chnong kiwa pyrchah yei noh jhep ha Mynkjai wei da pynngat lang ha kani ka mukotduma da ong ki wa ym pyrchah ki yei noh jhep lada bood katkam ka aiñ Solid Waste Management Rules, 2016 katkam wa pynmih da ka sorkar pyrdi hapoh ka aiñ Environment (Protection) Act, 1986 deiwa chna ya waroh iwa emkaam.
Ka High Court da phah ko leh ya ka sorkar jylla wow pait ya ini i kaam ym du ha Jowai, kamjooh leh ha waroh kawi ka jylla.
