U MLA ka United Democratic Party (UDP) uwa man leh kam u Montri sorkar, u Paul Lyngdoh da klam tikna u wa i pynkylla namo u pait biang deiwi ya ka Reservation Policy ym ye i wow pyndooh yei dooh kreh wei duna kreh hapoh Meghalaya.
U Paul da ong u yeini ynne hawa yaklam wa kiwa thoh khubor deiwa khana wa em 500 tylli ki kreh wa lait ha ka sorkar wa hi ki Company ka sorkar ha ka chi snem wei kani leh da man ko ka laad lait kreh wa dang duna kat dang lai i por.
“Ha kani ka juk wa katni toh u yaklam i chaphang kiwi ki laad wa ye u pynmih wei wow e kreh nadooh ki kaam uiñke suwari, ki soor that wa ki jait kreh wa e kyrchaan ka srokar kiwa emlaad bha wow heh u san. Tangwa i rukom pyrkhat won i toh iwa bakla,” da ong u Paul.
Da kdaw u leh wa hap wow chimkhia leh yei dih drugs, ya ki manbei wa psa khon samen, ki khynnah wym yoh baam deiwa biang, i yap ki khonboo wa dang kha, i wym yoh thaw ki bru dei yong ki hi wei kini toh ki kaam wa chon bha ha ka sorkar. “Tangwa ileh wym bien ki paidbah wow mih chakhmat neibynta kini, i daw toh wym ye ki wow pynmih yei mynsien wow kynchiñ wow choon ya uwon uwon wei ymtoh ki phang wa ka-it ki bru u yaleh, kamtæ ym em wa bna,” da pynsñiaw u Paul.
“Ka ri ka wym em ka thong kawa chynna jngai daw wiar ko”, da ong u Paul Lyngdoh deiwa kyntu ya ki paidbah wow tip u pyrkhat jngai kamjooh neibynta ki kajiak sngi wow wan.
“Kammon u ye u man wow em ka thong namo i angnood wow man kam u Chowkidar namo u sahep sorkar hawa i kam ka jaitbru da pynmih i ya ki karbar ri wa da mihkhmat ya ka ri, da pynmih i ya u Chief Election Commissioner of India, u Nuclear Scientist… toh u em i kam kini ki thong”, da ong u Paul.
