Ka Save Hynñiewtrep Mission (SHM) kawa man ka satri yong ki seiñbhalang na Ri-loom Khasi Jaiñtia wa kynthup yaka HYC, JSM, EJNC, CORP waka HANM ynne ka sngi da pynman ko yaka yalang chwa wow thang ya i dur bula yong u Montri Rangbah ka jylla, u Conrad Sangma, u Montri Rangbah ka Assam u Himanta Biswa Sarma wa u Montri ki Kaam Pohyung ka ri, u Amit Shah ha Jowai heiyatoh wa i chah siat yap ki san ngut kiwa chong chnong ka Mukroh ha ki pulit ka Assam.
Ha kani ka janmiet da em ka yalang heiwa ki seiñ da dawa ki wow kem noh ya kiwa emkti wow siat yap ya ki san ngut ha Mukroh ha ki pulit ka Assam.
Neiliang u Sambormi Lyngdoh, uwa man u President ka EJNC da ong u wa i jia ha Mukroh ymye wow pynbaad ya ki pulit tangwa ya ka sorkar jylla kawa pynsahteiñ yei kaam wow pynbait ya u pood u ang ka jylla waka Assam.
Da kylli u leh wa lada ka Mukroh haap ko namo ym haap ko ha Meghalaya neibhah wa katkam wa kam u Himanta Biswa da kam wa i thaw wa jia toh ha West Karbi Anglong District neibhah ini pynphylla ko ya kiwa chong chnong heiyatoh wa u pood ka jylla deiwa dawa ya u Conrad wow pynche u wa lada ka Mukroh em ko hapoh ka jylla.
U Sambormi da kylli u yaka sorkar jylla iyi wow leh ko ya kiwa da chim ya i mynsien wa kordor ka chnong Mukroh.
Heiyatoh wa i klam u Montri ki Kaam Pohyung ka jylla, u Lahkmen Rymbui uwa da ong wa oo toh u War wei ki War ymtoh ki jaitbru wa tieñslah, kamtæ lada toh u Lahkmen u War wei uwa ym tieñ tæ e yaka hukum ya u DGP wa u SP wow kem noh ya kiwa siat ya ki san ngut heitæ u ngait wa u Lahkmen ymtoh uwa tieñslah.
Da ong u leh wa ka Assam da ujor mukotduma ko pyrchah ya u MDC wa u Waheh Chnong ka Mukroh kamtæ da ban joor wow pyndam ya kani ka mukotduma.
Hajrong i pyntip u Conrad wa daw booh ya ki BOP, da ong u wa emkaam won wow tip lada ka sorkar Assam chah ko namo ymchah ko ya ini i thmu ka Meghalaya neibhah hadooh ynne ympu tip ya u pood wa paka ka jylla.
Puræ leh: Nga ym toh u tieñslah, nga toh u War u wym kynrandien: Lahkmen
