Shillong: Ka sorkar jylla da kyntu ko ya kiwa chong chnong ka jylla kiwa em cha baar wow man ki kiwa yaichah hadooh ka 30 tarik uni u bnai wei wow sah cha ki ha ki thaw wa em ki katni khnang wow kiar naka khlam u COVID-19.
Neiliang u Symbood Montri Rangbah ka jylla, u Prestone Tynsong da ong u wa ym myntoi ya kiwa em cha baar ka jylla wow uiñ ki cha yung neibhah ymyoh ki wow chong ha yung tanngwa daw haap neh chwa ki ha ki Quarantine Centre wa da pynkhreh da ka sorkar hadooh 14 sngi.
Da kyntu u leh ya kiwa chong chnong ka jylla kiwa em hayung hasem wow pynsñiawthooh ki ya ki bru yong ki wow man ki kiwa yaichah hadooh ka 30 tarik neibynta wow wanrah biang yei chngaaiñ hapyrdi yong ki waka jylla.
Kam wow kdaw heini da em 2192 ngut kiwa chong chnong kiwa em cha baar ka jylla wei kini kynthup ki ya kiwa puræ wa kiwa khih kreh cha ki thaw cha baar kiwa da kwah wow uiñ biang cha ka jylla Meghalaya.
Discussion about this post