Shillong: Ka United Democratic Party (UDP) ynne ka sngi da ong ko wa ym slem de u chim ko ya ka rai heiyatoh wa u kyrtong wa mynjur lang ha kani ka Election chiteiñ samoi ha Ranikor Constituency.
Ini da pyntip u UDP Senior Working President u Bindo M Lanong hadien wa chong yalang wa u Chairman ka PDF u Pynshngain N Syiem, u kyrtong ka UDP u Pius Marwein wa ki heh kiwi ki Party.
“I da sñiaw dadep ap i ya waroh ki yumut na waroh ki liang wei daw e ya ka bui cha ka Party yow ye ko u chim ya ka rai,” da ong u Lanong hadien ka yalang.
U Lanong da ong u leh wa em kiwa kwah ya u Syiem wow man u kam u kyrtong wa mynjur lang wei da em leh kiwa kyrchaan ya u Pius uwa da ye leh wo yoh hadooh 9,000 Vote ha kani ka Election MLA wa dadep.
Da ong u leh wa da em kiwa sñiaw wa daw man ko kawa khor ya u Syiem neidaw wa tbian i por wei da em leh kiwa ong wa u Pius toh ympu em biang rta u .
“Tangwa waroh da mynjur ki wa lada waroh arngut u yieñ yaleh Election ki pyn ar daw rem ki,” da ong u Lanong.
Neiliang u Pius won da ong u wa ha ka yalang da paan u yei kyrchaan kiwa kyrchaan ya ka PDF wow jied ya oo kam u kyrtong neibhah ka UDP em ko ka laad wow jop.
“Da chem ki wa kamwa 17,000 ngut kiwa thap Vote toh kiwa pyrchah ya u Danggo wei da thap ki cha ka UDP, PDF, NPP, BJP wa HSPDP. Ini pynyoo wa emlaad hi ka UDP wow jop.” Da ong u Pius.
Hawa kylli won kammon i sñiaw u Syiem yeini i kyrpaad u Pius da jubab u deiwa ong wa u Syiem daw chim u ka rai yong oo hi wei daw pyntip u ya ka rai yong oo.
Da ong leh wa i thmu kani ka yalang toh wow pyntikna wa u Danggo ym yoh de u wow jop kam u MLA.
Discussion about this post