Ynne ka sngi uwa e ktien ya ka Jaiñtia Hills Autonomous District Council, u Phasmon Dkhar da beiñ u yeiwa klam uwa yahkhmat ka Liang Pyrchah hapoh ka Council, u Andrew Shullai ynnin deiwa ong wa kani ka Mang Tangka ka Council ymtoh kawa sñiawhun ya ki MDC wa ki paidbah.
U Phasmon da sñiawphylla u leh yeini deiwa ong wa kani ka Mang Tangka ymtoh kawa da chna tangdep donhi tangwa kawa da chong pyrkhat bha da ka Executive Committee wa ki sahep ka Council.
Da ong u wa hawa pyrkhat ya kani ka Mang Tangka ymtoh neibynta ki kattu katni tangwa toh kawa neibynta ki paidbah ka Ri-loom Jaiñtia waroh.
Chooh chooh da kdaw u leh ya ki kaam pynroi wa daw leh napoh kani ka Mang Tangka wa kynthup i chna ya ki 84 tylli ki Community Hall, 41 tylli ki sarok, 26 ki luti lai-kjat, 31 tylli ki yung skur, 35 tylli ki madan yalehke, 3 tylli ki Gallery, 10 tylli ki thaw rieh slap wa kiwi kiwi.
Da ong u wa kat kini ki kreh kammon wa ong u Andrew Shullai wym hun u ya kani ka Mang Tangka, neibhah lada ym sñiawsuk toh u pyrchah namo u booh da ka Cut Motion ynne ka sngi ha ka dorbar.
Heijooh i por da khut u leh ya u Andrew wow krehlang wa ka Executive Committee khnang wow kreh neibynta i bha i miat ka Ri-loom Jaiñtia waroh kawi wei wow yoh yaroh yei leh kani ka EC wa katni.
Puræ leh: Kani ka Dorbar Mang Tangka ka JHADC toh kawa pyndooh mynsien ya kiwa boon: Andrew Shullai
