Hadien wa mih i kynrum kynram heiyatoh wa i rai ka NEHU wow pynkrehkaam noh ya ka National Education Policy 2020, ka Hynniewtrep Youth Council (HYC) da ong ko wa ka sorkar toh u wan ko chaphrang ha kam ini i por, wei wow klam katwon da mang ko wow pynlut neibynta wow pynkrehkaam ya ka NEP ha jylla.
U President ka HYC, u Robertjune Kharjahrin da ong u wa ini toh i kaamram ka sorkar jylla neibynta wow pynkrehkaam ya ka NEP, neibhah kamwa 6% na ka GDP toh wow pynlut ka sorkar jylla, deiwa pynrap wa lada ka sorkar wa u Montri Rangbah ym wan ki chaphrang ha kam ini i por mynnu won u mih ki?
Ka HYC ryngkat wa ki dkhot ka NEHUSU ynne ka sngi da yachem ki ya u Vice Chancellor ka NEHU, u Prof. PS Shukla wow paan pynche hajrong i rai u VC kani ka skurbah wow pynkrehkaam noh ya ka NEP ha ka jylla nadooh uni u Naisaphra.
U Robert da ong u wa hadien ini i yachem neiliang u Vice Chancellor da kular u wow chimkhia wow khut yaphyllu yumut biang ha ka yalang kawa jhan kawa daw khut lang leh ya ki Principal na ki College, kiwa sikai, ki sahep yong ka sorkar jylla wei kamjooh ki seiñbhalang.
Da ong u wa neiliang u Vice Chancellor da pynsñiaw u wa lada krehkaam ya ka NEP, i yoh nong toh ya ki khynnah puræ yong ka jylla. Tangwa neiliang u heh ka HYC da pyntip u leh wa ka seiñ da klam che lada ka NEHU lai ko chaphrang wa ka NEP wei lada ki khynnah puræ ka jylla chem ki yei eh i khor toh u bahkhlieh kiwa chim ya ka rai.
Neiliang uwa yahkhmat ka NEHUSU, u Manbor Lyngdoh da ong u wa i yachem wa u VC da man ko kawa mihsoh wei neiliang ki khynnah puræ yang ki ya kitæ ki rai ka wow mih na ka yalang wa da kular u VC wow khut.
Discussion about this post