U VGK Kynta uwa man u Muktiar wa da rangbah ka jylla, da ong u wa iyi u myntoi wow tip u klam pharæng, i puræ ya ki jait pa ki jait hawa ym tip won ya i tynre. Wei da pynrap wa chwa wow ktah ya ki kaam khappood toh wow yaklam yaphyllu kawa nadooh na tynre, ym deiwa pynbait hi-eh na suiñ deiwa ya chong dih cha hapyrdi ki ar ngut ki Montri Rangbah.
Hawa klam ha ka yalang pynlait kot, u Kynta da ong u wa da jooh klaam boonsien hawa yatoh wa ka rukom ksoh yei khyndaw ha kani ka jylla wa ka phær ko na kiwi ki thaw. Da ong u wa ha kiwi ki bynta yong ka ri India, ka khyndaw toh ka yong ka sorkar, tangwa ha Meghalaya laitnoh ya ki Reserve Forest wa ki Ward wa Cantonment ha Shillong, ya i khyndaw da mantre da ki paidbah wei ka sorkar ym ye ko wow leh katwa kwah.
Da kynthah joor u leh ya ka soskular pynbait pood wa da soi hapyrdi ka jylla Meghalaya wa Assam, neibhah ha ri Khasi-Jaiñtia ya i khyndaw da mantre da ki paidbah wei em leh da ki Raij, ym man iwa suk wow e kti cha Assam yow kylla man Revenue Land, wei da booh yukylli wa kitu ki thaw wa poi na Assam cha Meghalaya u haap ki ha i kti yong kiyi.
Da ong chooh chooh wa i soi ya ka soskular hapyrdi ki Montri Rangbah ka Meghalaya wa Assam da pynmih ya u dak kylli uwa heh wa em ka kayi re kayi ka buit Politic cha kylla.
