Ka Hynniewtrep National Liberation Council (HNLC) da pynbaad ko ya ka sorkar Meghalaya wa leh ar sap deiwa khut yaklam yasuk heijooh i por deiwa lai kem ya kiwa chong chnong wa lui-lui.
Ha ka kyrwoh wa phah da u General Secretary ka HNLC, u Saiñkupar Nongtraw ynne, da beiñ u yeiwa khut u Deputy Chief Minister, u Prestone Tynsong ini wadep yow wan yaklam yasuk deiwa ong wa da ini toh deiwa arsap wei khlem da tip bha.
U Saiñkupar Nongtraw da ong u wa ini iwa kam ka sorkar wa ki dwar ko dang wai ki yow yaklam tangwa dang pteiñ hi ko wow lai pyndik pyntieñ ya kiwa chong chnong deiwa kdaw yeiwa jia ini wa dep ha Ri-Bhoi District heiwa da kem ya kiwa boon ki khynroo kiwa suba wa emkti wa ka HNLC.
Ka HNLC da pynche ko wa kitu kiwa chah kem ha Ri-Bhoi ym em yatoh ki wa ka seiñ wei da leh ka sorkar yeini du wow pyntieñ wei wow pynkulmar ya ki paidbah yow murieh ya ki kaam wym ye ko u leh.
Ka seiñ da beiñ ko leh yeiwa lai kem biang ka sorkar ya kitu kiwa dang dep pynlait napoh patok iwa man kamwa pynemkaam ya ki pulit kaam ka tiar yaleh yow pyndooh mynsien ya ki paidbah.
Ka HNLC da ong ko wa kwah hi ko yei suk tangwa hap wow pynyoo dei kaam ymtoh da ki kular wa thylli. Ka seiñ da dawa ko wow pynbait noh ya u pood ka Meghalaya-Assam iwa da ktah ya ki paidbah da ki phaw snem.
“Lada ym ye u pynbait ya pood, ham pynbna yei yaklam yasuk,” da ong ka HNLC.
Ka seiñ da kdaw ko leh yei wym pu ye u kyrriah ya kiwa sah ha Them Iewmawlong iwa da sahkut katni khlem da leh iyi iyi.
Kamtæ ka HNLC da ong ko wym chah pynbiej ko ha ki kyntien wa thiang wa ki kular wym ye u leh wei ym embynta ko hei yaklam yasuk ha ka rynsan wa chet kylla wei du neibynta wow yoh yaroh ki kaam Politics.
Da pynkut deiwa ong wa ym em i suk katwa dang chah nioñbeiñ kiwa khian wa nai kiwa dang hok wei deiwa yada ya kiwa baam tooh.
Discussion about this post