Ka yung krehkaam u Dolloi Elaka Narpuh, hei yahkhmat u Dolloi, u Manbha Kyndoh deilang ki waheh chnong ka Chiehruphi, Thangskai, Wahiajer wa kiwi de da lai e ki dei thoh cha u DC ka East Jaiñtia Hills deiwa phah ka leh cha u Montri Rangbah, ki Montri sorkar wa ki MLA ka thaaiñ deiwa ong wa i yakhih wa pynman pyrchah aiñ da ka MCTODA nadooh ka 27 tarik u October da ktah joor bha ko ya ki tre chnong kiwa em 2500 hadooh 3000 ngut kiwa da chaniah yow kamai ha ki Cement Plant wa em kamwa 7-8 tylli hapoh ka District.
Kini kiwa chah ktah toh nadooh kiwa yah Truck, yah JCB kiwa e wai kari hadooh kiwa pynbiang ya u moo u chyiap, ki dieñ ki siej cha kini ki karkhana heiwa kattæ waroh i kreh ki da sangeh i wei hadooh i dor khyndaw-bilat wa yoh hei dor wa duna leh ym yoh de ki wei ini da ktah won ko ya kiwa kreh mistri.
Najrong ini da ong leh wa em 40,000 hadooh 50,000 ngut kiwa da chah ktah na ini i yakhih deilang kiwa dai baam, ki dukan wa em charood sarok hadooh kiwa yah kari.
Da ong wa kani ka yakhih da pynsangeh ko leh ya ki kaam pynroi wa wanrah kini ki karkhana lyngba ka CSR wei hadooh ka poisa wa pynlang hapoh ka DMF leh daw chah ktah ko lada ym krehkaam kini ki karkhana.
Kamtæ da ong wa kattu da jan poi sa ka lehkmen Christmas kamtæ da ktah ko yei kamai kajih ki bru neibhah kani ka yakhih da pteiñ ko la 15 sngi hadooh wym sñiaw em mynsien de wow lehkmen.
Hajrong ini waroh da dawa na ka sorkar wow pynkut noh smat ya kani ka yakhih khlem da pynslem de yow ye biang ki bru wow yoh u kamai yow lait ki nei eh wa da wanrah da ka MCTODA deilang kiwa kyrchaan ya ki khlem da leh bakla kiwa chong chnong ka Elaka iyi iyi leh.
Discussion about this post