U President yong ka Synjuk Waheh Chnong Ri-Jaiñtia, u Army Lipon hawa e yei klam ynne ka sngi ha ka yakhih ka Jaiñtia Coordination Committee for Reservation Policy (JCCRP) ha Iawmusiang, Jowai da e khublei u ya ki seiñbhalang wa da seiñ ki ya kani ka Committee chirup wa ki Waheh Chnong ka Ri Jaiñtia wa ka sor Jowai.
Da ong u wa da yoo ha ki snem wa da lai heiyatoh wa ki blai san snem wei kattu sanphaw snem da lai ka Ri Jaiñtia dang neh ko kamjooh deiwa e nongmuna nadooh kiwa chongdai wa i kreh wa sahteiñ ya ka Iawmusiang, yoowyrai u wow yoo ya ki seiñ wa dawa ya ka Government College tangwa waroh sahteiñ.
“Nga ym em u wan O wow phiah ya ka jaitbru Khasi e wow rwai kam hei yongrim Ri Khasi Ri Jaiñtia ymtoh kamwa man katni Ri Khasi Ri Khasi, wei da kwah O wow mih u yoo biang ki wow mih ka Ri Jaiñtia (Jaiñtia Kingdom) wa chong ki syiem kiwa chong cha Bangladesh wa ki moopynyieñ ha Nartiang wa kiwi ki thaw,” da ong u Army deiwa pynrap wa oo u man uwa nyngkong wow choh dwar ya ki 7 ngut ki 7 yuspong ki syiem ka Jaiñtia wow klam ki chisur chidur wow klam ha Cabinet wow wanrah ki ya ka Reservation Policy ya ki Jaiñtia.
Da ong u leh wa lada ymye wow e bhah ya u Jaiñtia toh sadu u kynthup lang waroh le jaitbru hapoh kani ka 80% wei ymhoi u wiar u Jaiñtia wa ki jaitbru Jaiñtia neibhah lada kyruiñ cha Lok Sabha wa Rajya Sabha da chong da ki Jaiñtia wei katwa kwah wa paan i ymjooh yoh i.
Kamtæ da toh i por wow sylli ya ka Reservation Policy wei ymhoi u wiar i ktien næ pyrtuid Jaiñtia deiwa kyrpaad ya ki 7 ngut ki MLA ymtoh u chah ki wow wiar i ktien Jaiñtia.
Da kyntu u leh ya ki paidbah ka Ri Jaiñtia wa ymtoh u em ki yei sñiaw Party tangwa toh u em ki yei sñiaw maya ya ka jaitbru khnang wa ka mynried u im ki.
