U Chairman ka Confederation of Meghalaya Social Organisation (CoMSO), u Robertjune Kharjahrin da ong u wa lada ym yohlaad wow yachem wa u Montri Kaam Pohyung ka ri, u Amit Shah ha ka 23 tarik, neiliang ki seiñbhalang hapoh ka CoMSO daw lai ki cha ki paidbah mynstep ka sngi yow chim ya i rai. Da ong u wa ym em i eh ya ki paidbah wow pynyoo da ki dak ki chin ha ka yong ki hi ka jylla wow dawa ya ka ILP deiwa rah ya iwa da thoh dei thoh.
Ka CoMSO ynne ka sngi da pynman ko ya i yakhih wa jai jai, deiwa thang mombati kam i dak wow pynyoo yei pyrchah yei wym bna ka sorkar ya kiwa boon ki dawa wa kynthup ya ka Inner Line Permit.
Hawa kylli, u Kharjahrin da pyntip u wa ka seiñ da pynkhreh ko da kiwi ki yakhih ha kani ka sngi wa ka jylla lehkmen ko yei dap 49 snem, tangwa hadien wa da yoh yutip wa daw wan u Amit Shah, da pynman noh du yaka yakhih thang mombati. Da pyntip u leh wa neiliang ka CoMSO da thoh ko cha u Chief Secretary ka jylla yow yoh yachem ya u Amit Shah, deiwa pynrap wa emkaam wow yoh yachem markhmat wa u Montri yow sñiawthooh che yeiwa iyi mut u, neibhah wa katni ini i kaam dang em i hei yaklam.
U Robert da ong u wa i sur wa thai tam wow yoh ya ka ILP wa ka jylla da pynmih ko toh naka Yung Dorbar Chna Aiñ, ka sur kawa ar toh i yachem markhat wa u Amit Shah khnang wa ki paidbah daw pynsñiaw ki hadooh wa che.
Uwa yahkhmat ka CoMSO da pynsñiaw u yei kyrmen wow yoh yaklam markhmat wa u Montri ka sorkar India, deiwa ong u wa lada ym em i dak wa ye ki u yachem, neiliang ka CoMSO daw lai ki cha ki paidbah, tangwa u yang chwa ki hadooh mynstep ka sngi yow chim ya i rai.
