Ka Jaiñtia National Council (JNC) Central Executive Committee ha ka kyrwoh na u President ka seiñ, u Sambormi Lyngdoh da pynsñiaw ko yei sñiawsih hajrong i yakhih ka MCTODA neibynta ka bai kit ka wym biang su da ki kharkhana Cement.
U President ka JNC da ong u wa ynnin ka sngi ka seiñ da lai yachem ko markhmat wa ki dkhot ka MCTODA kiwa dang yakhih heitai ha Mawryngkneng, wei hei yachem wa ki da yoh wow tih bniah yei daw tre i yakhih wei da chem wa i ong yong ka sorkar wa i dor bai kit ki Truck na ki karkhana Cement dadep wow e katkam i dor wa da booh da ka sorkar, “Hao ye u man ini wa ong ka sorkar tangwa ymtoh won wa waroh salonsar yoh ki yei dor lait noh du ya ki kattu katni ngut ki bru. Wei kani man ko ka daw wa pteiñ i yakhih ki tre wa kiwa yah Truck, wei lada ki kharkhana pynkrehkaam hok ki ya i dor katkam wa booh ka sorkar cha warohlang, neiliang ka seiñ kiwa kamai Truck leh ym kwah ki u yakhih.”
Hawa pyrchang wow thooh chooh chooh ya i daw hawa yaklam wa ki yahkhmat ka MCTODA da chem wa i dawbah hi toh na ka JHADC kawa man kawa yada yei khih i kreh ki yong ki tre chnong kawa da pynskem pathan yei khih i kreh yong ki bru wa na baar, wei sa kawi ka daw leh toh na i yoh laitlan ki kharkhana Cement wow thied ya ki kari ki yong ki iwa da ktah ya ki tre chnong yong i, heiwa ka Star Cement da em ko 300-400 tylli ki Truck kamjooh ka TopCem, ka Amrit wa kiwi kiwi.
Neiliang ka seiñ kyntu joor ko ya ka District Council wow pynkrehkaam hok ko ya katu ka kyndon ka aiñ ki baar jylla wa wan khih cha i khamtam heiyatoh wa i thied kari yong kini ki kharkhana, wei kamjooh ya ka sorkar wow booh ko katwon tylli ki kari wa ye kini ki karkhana u thied khnang wow lait ko u ktah ya ki tre ri ki yong i kiwa em kari.
Ka seiñ da ong ko leh wa phylla yei klam yong ki ar ngut ki montri sorkar heiwa u Transport Minister da khut wer u ya ka Association cha ka miej yaklam neibhah kawon kawon ka yakhih emkaam i yaklam khnang wow pynbait yei kaam, katwa u Home Minister won lyngba ka chnat pulit da phah kem u ya kiwa yahkhmat ka Association, wei kani hi pynyoo ko ya i yaphær yumut hapyrdi kini ki ar ngut ki montri sorkar. Wei lada ka sorkar kwah sakhiat ko yei bha i suk i saaiñ toh u pynlait ko khlem pynslem ya kiwa yahkhmat ka MCTODA khnang wow em i yaklam.
Khaddooh ka seiñ lyngba kani ka khubor phah ko cha ki ar tylli ki seiñ kitæ ka JAC chirup wa ka MCTODA wow man ki kiwa tylli kam ki khon ka Bri u Ynñiawtrep khnang wow lait na i yaphær yumut wei kini ki bru na baar leh ym yoh ki u yoobeiñ ya i, neibhah kynmoo wa kani man ko ka buit yong kini ki bru na baar wow pynyachruit pynyachoh ya i khnang wa i yaleh pyrchah ya ki yow man ko kawa tlot.
Ynnin ka sngi ka seiñ da lai ko wow e mynsien ya ki paradoh prasnaam yong i ha i yakhih i yong ki wei neiliang ka seiñ ha kini ki ar sngi le sngi wa daw wan daw pynman ko ya ka yalang CEC wa jhan neibynta wow chim ya ka rai neibhah kam ka seiñ wa kreh yei bha i miat ym kwah ko wow man du kam kawa paitke donhi, khamtam heiyatoh wa i chah kem kiwa yahkhmat ka MCTODA hadien wa yoo wa uwi na ki heh Company uwa tip kam u Devendar da maham u wow phah kem ya ki, tangwa kani ka maham yong oo daman ko kam iwa da tip chwa iyi wa ka chnat pulit daw leh ko ya kini ki seiñ Truck, wei ya kam ini ka seiñ ym sñiaw ye ko u pdiang da kammon kammon leh wei hadien ka yalang CEC ka seiñ daw chim ko ka luti khamtam ya kitai ki bor kiwa na baar kiwa pyrchang u yaleh wow yoobeiñ ya i ki tre ri tre chnong.
Discussion about this post