U Montri ka chnat Social Welfare ka sorkar jylla u Kyrmen Shylla hawa sakhi yei chaad Behdieñkhlam ka Seiñ Raij Tuber kawa man kawi naka chaad niam Behdieñkhlam waheh tam ha Ri-loom Jaiñtia kawa da pynkut ynne ka sngi ha Tuber Kmaichnong, East Jaiñtia Hills District, da ban joor u hajrong emkaam wow chim yei tika khnang yow yoh yada naka khlam COVID-19, kawa da poor haka jylla, ka ri waka pyrthai hi waroh kawi.
Heijooh i por kam u MLA ka thaaiñ uwa da dep yoh ya kani ka tika waroh ar sien, chim haroh u yaka kabu wow pynchlur yaki khon ka Raij wow mih ki chakhmat deiwa bood yei nongmuna yong oo.
Khana u wa hei yohlaad yong oo wow yachem yumut waki Doctor ha ki sngi wadep, dang pyrkhat u jan wym emkaam de u wow deiñ Mask katwa da dep yoh tika u waroh arsien, tangwa ki Doctor ong ki ya oo kamwa 90% ye wow lait nei yap kiwa wada dep yoh tika, tangwa dang em hi ka laad wow yoh COVID-19 won wot hadien wada dep e tika leh lym man kiwa syndong.
“Neiliang ka sorkar ym em pynbor ko wow chim tika, tangwa i kwah i wow pyn sñiawthooh ha phi hajrong i emkaam wow e tika. Em phi ka hok wow sñiawthooh wa kammon u yada pyn ya idæ, neibhah deiwa chim tika phi yarap haroh phi yaka yung ka sem yong phi wa kiwa em soodong yong phi,” ong u Kyrmen Shylla.
Chooh chooh ong u wa i dooh laad wow chimbynta yonglang ha kani ka Behdieñkhlam kamwa jooh man nachwa toh neidaw wa boon ki paidbah ym pu em chim tika yada ki.
Kamtæ ngait skem u wa lada ye u pyndep yei e tika kamwa phah ka sorkar 90% chaneiñ, ha u snem wow wan waroh daw yohlaad u chimbynta ya chaad Behdieñkhlam kam nachwa.
Pynsñiaw haroh u i diaw neibhah wa ha u snem wa dep kiwa boon hi ki yung ki sem duwai ki ha jar jiar i ngait yow yoh yaki bru chemphang (Scientist) neibynta u pynyoh dawai yow lait na kani ka khlam, tangwa manda yoh won katni boon kiwa kyntait.
Kamtæ kyntu joor u yaki paidbah wow chim ya i tika yada kawa da dep ya angnood khnang yow ye u im biang kamwa jooh, wym toh wow ap ya ki khubor wa boonjait, neibhah boon hi kiwa da dep yoh tika ym em jia iyi iyi waphær ya ki.
