Shillong: Ka Committee on Environment ka Meghalaya Legislative Assembly, ynne ka sngi da hiar ko cha Wahkaji, South West Khasi Hills District, wow ap yei pynsñiaw ki paidbah heiyatoh wa em i lait ka la’ær bih na i thaw booh tngit Uranium wa da sdang kaad.
Ka Committee ynne ka sngi da thmu ko wow lai chadooh cha Domiasiat kawa em ki top wa pynlang ya kini ki jhep Uranium, tangwa neidaw wa jngai ka luti wei wym chah de i por, da liwan noh ki wei kani ka Committee toh kawa da yahkhmat da u Syntar Klas Sun uwa man u Chairman ka Committee.
Neiliang u SK Sun da kyntait u wow khana ya i rai ka Committee, deiwa pynrap wa daw chong pyrkhat biang ka Committee wow ap yei sñiaw ki paidbah wa ki seiñbhalang.
Ha ka yalang wa tbian wa man, da yoh yei klam na u MLA ka Ranikor, u Pius Shadap uwa da ong wa kani ka phang ymtoh kawa thymme wei wa hadooh katni ym em soskular wow tih biang ya u Uranium hapyrdi ka Uranium Corporation of India Ltd (UCIL) wa ka sorkar, wei i pait ka UCIL ha kani ka thaw da phah sangeh chwa neibhah ympu yoh ya ka NOC na na ka District Council.
Neiliang ki seiñbhalang kiwa kynthup ya ka Khasi Students Union (KSU), da kyntu ko ya ka Committee wow rah ya ka wyrta cha ka sorkar wow pynkut wei wow khylliap noh ya kani ka bynta wa yatoh wa u Uranium khnang wow yoh biang yei chongsuk.
U Forwardman Nongrem da pynsñiaw u yei pyrchah lada ka sorkar thung ko ya ki stat wow thooh bniah kiwa yachah chiliang wei toh u man ko kawa laitlooid deiwa klam che wa ka AMD ymtoh u yahbakla ko ya ki paidbah deiwa pynrap leh wa toh i kaamram ka sorkar wow pyntikna wa i kaad ki thaw booh jhep Uranium ymtoh u ktah i ya ki paidbah.
